విజయపురిసౌత్, నవంబర్ 16: శ్రీశైలం నుండి నాగార్జునసాగర్ జలాశయానికి నీటి విడుదల గురువారం పూర్తిగా నిలిచిపోయింది. ప్రస్తుతం సాగర్ జలాశయం నీటిమట్టం 572 అడుగులకు చేరుకుంది. ఇది 261.5900 టీఎంసీలకు సమానం. తాగు, సాగునీటి అవసరాల నిమిత్తం కుడికాలువకు 9104, ఎడమ కాలువకు 4223, ఎస్‌ఎల్‌బిసికి 1800 క్యూసెక్కులు మొత్తం అవుట్‌ఫ్లోగా 15127 క్యూసెక్కుల నీటిని విడుదల చేస్తున్నారు.

గుంటూరు, నవంబర్ 16: కేంద్ర ప్రభుత్వం ప్రవేశపెట్టిన ఈనామ్ మార్కెటింగ్ విధానం బాలారిష్టాలను అధిగమించి సత్ఫలితాలను ఇస్తోంది. గుంటూరు మిర్చి యార్డులో పూర్తిస్థాయిలో ఈ ప్రక్రియ అమలు జరుగుతోంది. దీనివల్ల ఎప్పటికప్పుడు ఆన్‌లైన్‌లో మిర్చి ధరల విషయమై రైతులకు సెల్‌ఫోన్‌లో మెసేజ్‌లు అందుతన్నాయి. దీంతో ధరల్లో హెచ్చు తగ్గులకు అనుగుణంగా రైతులు సరకును విక్రయిస్తున్నారు.

పుట్టపర్తి, నవంబర్ 16: పుట్టపర్తి సత్యసాయి బాబా 92వ జయంతి వేడుకలకు విస్తృత ఏర్పాట్లు చేస్తున్నారు. ఈనెల 18న వేణుగోపాలస్వామి రథోత్సవంతో జయంతి వేడుకలు ప్రారంభమవుతాయి. 19న అంతర్జాతీయ మహిళా దినోత్సవం, 20, 21 తేదీల్లో సత్యసాయి అంతర్జాతీయ వేద సమ్మేళనం నిర్వహిస్తారు. 22న డీమ్డ్ యూనివర్శిటీ 36వ స్నాతకోత్సవం జరుగుతుంది. ఈ కార్యక్రమంలో ముఖ్యఅతిధిగా ఉప రాష్టప్రతి వెంకయ్యనాయుడు పాల్గొని ప్రసంగిస్తారు.

అనంతపురం, నవంబర్ 16: రాష్ట్రంలో బాల్య వివాహాలు జరగకూడదని, వాటిని ప్రోత్సహించే వారిపై చట్టపరంగా కఠిన చర్యలు తీసుకుంటామని రాష్ట్ర మహిళా కమిషన్ చైర్‌పర్సన్ నన్నపనేని రాజకుమారి హెచ్చరించారు. గురువారం అనంతపురం ప్రభుత్వ సర్వజన ఆస్పత్రిని తనిఖీ చేసి రోగులకు అందుతున్న సేవలపై ఆరా తీశారు. తాడిపత్రికి చెందిన నాగరత్నమ్మ ఆడబిడ్డకు జన్మనివ్వగా పాపకు అమరావతి అని నామకరణం చేశారు.