శ్రీశైలం, సెప్టెంబర్ 18: ఆర్థిక సమస్యలతో సతమతమైన ఓ తల్లి తన ఇద్దరు కూతుళ్లతో కలిసి శ్రీశైలంలోని పాతాళగంగ వద్ద కృష్ణానదిలో దూకి ఆత్మహత్య చేసుకుంది. మృతులను కర్నాటకకు చెందిన జగ్గదేవి (26), ఉషాబాయి (4), లక్ష్మి (2)గా గుర్తించారు. సోమవారం మృతదేహాలు నీళ్లలో తేలడంతో స్థానికులు గమనించి పోలీసులకు సమాచారం అందించారు.

గుర్రంకొండ, సెప్టెంబర్ 18: కార్యకర్తల అభీష్టం మేరకు టిడిపిలో చేరుతామని మాజీ ముఖ్యమంత్రి కిరణ్ కుమారరెడ్డి సోదరుడు కిశోర్‌కుమార్‌రెడ్డి అన్నారు. తమ కుటుంబం 30 సంవత్సరాలుగా రాజకీయాల్లోకి వచ్చి పార్టీకతీతంగా ప్రజా సేవ చేశామని అన్నారు. తండ్రి, తరువాత అన్న ముఖ్యమంత్రిగా ఎదిగి నియోజక వర్గానికి దాదాపు రూ.2000 కోట్లు అభివృద్ధి పనులు చేశారన్నారు.

ఒంగోలు, సెప్టెంబర్ 18: రాష్ట్రానికి ప్రత్యేక హోదా కోసం అవసరమైతే తమ పార్టీ అధిష్ఠానం ఆదేశిస్తే తమ ఎంపి పదవులకు రాజీనామాలు చేసేందుకు సిద్ధంగా ఉన్నామని తిరుపతి పార్లమెంటు సభ్యుడు వరప్రసాద్ వెల్లడించారు. సోమవారం ఒంగోలులో ఏర్పాటు చేసిన విలేఖర్ల సమావేశంలో ఆయన మాట్లాడుతూ రాష్ట్రానికి ప్రత్యేక హోదా సాధన కోసం వైఎస్‌ఆర్ కాంగ్రెస్ పార్టీయే గట్టిగా పోరాడుతోందని గుర్తుచేశారు.

కర్నూలు, సెప్టెంబర్ 18:నోబెల్ పురస్కార గ్రహీత కైలాష్ సత్యార్థి బాలల సంరక్షణ కోసం మంగళవారం కర్నూలులో ర్యాలీ నిర్వహించనున్నారు. ఈ కార్యక్రమంలో రాష్ట్ర ప్రభుత్వం తరఫున స్వయంగా ముఖ్యమంత్రి నారా చంద్రబాబునాయుడు పాల్గొననున్నారు. ‘సురక్షిత బాల్యం-సురక్షిత భారతదేశం’ నినాదంతో కన్యాకుమారి నుంచి కాశ్మీర్ వరకూ కైలాష్ సత్యార్థి భారతదేశ యాత్ర నిర్వహిస్తున్న సంగతి తెలిసిందే.