కర్నూలు, జూలై 15: కర్నూలుకు చెందిన తూనికలు కొలతల శాఖ అధికారి స్వామి లంచం తీసుకుంటూ శనివారం ఎసిబి అధికారులకు చిక్కారు. వేబ్రిడ్జి అనుమతి రెన్యూవల్ కోసం ఆళ్లగడ్డకు చెందిన దాని యజమాని రామలింగయ్య నుంచి రూ.30 వేలు లంచం తీసుకున్న తూనికల, కొలతలశాఖ జిల్లా ఇన్‌స్పెక్టర్ ఎన్.స్వామిని అరెస్టుచేసినట్లు ఎసిబి డిఎస్పీ జయరామరాజు తెలిపారు.

విశాఖపట్నం, జూలై 15: వాయువ్య బంగాళాఖాతంలో ఏర్పడిన ఉపరితల ఆవర్తనం శనివారం ఉదయానికి అల్పపీడనంగా మారింది. ఇది రానున్న 48 గంటల్లో మరింత బలపడి వాయుగుండంగా మారే అవకాశం ఉందని విశాఖ తుపాను హెచ్చరికల కేంద్రం అధికారులు శనివారం రాత్రి తెలిపారు. అల్పపీడనం ప్రభావంతో రాగల 24 గంటల్లో కోస్తాలో పలు చోట్ల మోస్తరు వర్షాలు కురిసే అవకాశం ఉండగా, ఒకటి రెండు చోట్ల భారీ వర్షాలు కురుస్తాయని తెలిపారు.

ఒంగోలు,జూలై 15:పుట్టబోయే బిడ్డ ఆరోగ్యవంతంగా ఉండాలనే సదుద్దేశ్యంతో అన్న అమృతహస్తం పథకాన్ని రాష్ట్రంలో అమలుచేస్తున్నామని, ఈపథకంలో సిబ్బంది ఏమాత్రం నిర్లక్ష్యం వహిస్తే సస్పెండ్ చేసేందుకైనా వెనకాడే ప్రశక్తేలేదని రాష్ట్ర స్ర్తి,శిశుసంక్షేమశాఖమంత్రి పరిటాల సునీత హెచ్చరించారు. శనివారం మద్దిపాడు, ఒంగోలు మండలాల్లో ఆమె పర్యటించి అంగన్‌వాడి కేంద్రాలను ఆకస్మికంగా తనిఖీచేశారు.

విజయవాడ (క్రైం), జూలై 15: స్కూలు పిల్లలు డ్రగ్స్ వాడుతున్నారనే అంశాన్ని పక్కదోవ పట్టించేందుకే సినిమా పరిశ్రమను టార్గెట్ చేశారని ప్రముఖ నిర్మాత అశోక్‌కుమార్ ఆరోపించారు. శనివారం ఆయన ముఖ్యమంత్రి చంద్రబాబును కలిశారు. ఈసందర్భంగా అశోక్‌కుమార్ మాట్లాడుతూ ఇతర ప్రాంతాల నుంచి వచ్చిన వ్యక్తుల వల్లే సినిమా పరిశ్రమలో డ్రగ్స్ వాడకం మొదలైందని తెలిపారు.