విజయవాడ, జూలై 3: గ్రూప్-2 దరఖాస్తుల్లో తప్పుల సవరణకు ఎపిపిఎస్‌సి చివరి అవకాశం కల్పించింది. జోన్, జిల్లా, కుల వివరాల్లో తప్పులను సరి చేసేందుకు గడువు ఇచ్చారు. ఈ నెల 15లోగా తప్పులు సరిచేసుకోవచ్చని అధికారులు తెలిపారు. ఇదే చివరి అవకాశమని, మరో అవకాశం ఇవ్వమని స్పష్టం చేశారు. ఈ నెల 15, 16 తేదీల్లో గ్రూప్-2 మెయిన్ పరీక్ష నిర్వహించనున్నారు.

విజయవాడ, జూలై 3: రాష్ట్రంలోని వివిధ పాఠశాల భవనాల దుస్థితిపై వస్తున్న కథనాలపై విచారణకు రాష్ట్ర మానవ వనరుల అభివృద్ధి శాఖ మంత్రి గంటా శ్రీనివాసరావు ఆదేశించారు. పాఠశాల భవనాల నిర్వహణకు నిధులు అందుబాటులో ఉన్నప్పటికీ, ఇంకా పెచ్చులూడే స్థితిలో భవనాలు ఉండటంపై ఆగ్రహం వ్యక్తం చేశారు. వీటిపై నివేదిక అందించాలని, ప్రత్యామ్నాయ చర్యలు చేపట్టాలని ఆదేశించారు.

విజయవాడ, జూలై 3: మద్యం దుకాణాలకు దేవుళ్ల పేర్లు పెట్టడం సరికాదన్న అభిప్రాయాన్ని రాష్ట్ర దేవాదాయ శాఖ మంత్రి పైడికొండల మాణిక్యాలరావు వ్యక్తం చేశారు. వెలగపూడి సచివాలయంలో ఆయన సోమవారం మీడియాతో మాట్లాడుతూ ఈ విషయమై మద్యం దుకాణాల యజమానులు ఆలోచించాలన్నారు. సదావర్తి భూములపై కోర్టు తీర్పును స్వాగితిస్తున్నామన్నారు.

విజయవాడ, జూలై 3: మన్యం వీరుడు అల్లూరి సీతారామరాజు తరతరాల స్ఫూర్తిదాత అని, రంపపోరుతో వలసపాలకులపై తదుపరి పోరాటాలకు మార్గదర్శనం చేశారని ముఖ్యమంత్రి నారా చంద్రబాబునాయుడు అన్నారు. జూలై 4న అల్లూరి సీతారామరాజు జయంతి సందర్భంగా అల్లూరి స్ఫూర్తిని ముఖ్యమంత్రి జ్ఞాపకం చేసుకున్నారు.