తిరుపతి, జూన్ 20: విశాఖ భూ కుంభకోణంపై సిబిఐ విచారణకు బాబు భయపడుతున్నారని వైకాపా రాష్ట్ర ప్రధాన కార్యదర్శి బొత్సా సత్యనారాయణ అన్నారు. చిత్తూరు జిల్లా వైకాపా ప్లీనరీ సమావేశంలో బొత్సా ముఖ్య అతిథిగా పాల్గొని ప్రసంగించారు. ఈ భూ కుంభకోణానికి సంబంధించిన రికార్డులు హుద్‌హుద్ తుఫాన్‌లో కొట్టుకుపోయాయని చెప్పి తప్పించుకునే ప్రయత్నం చేస్తున్నారని మండిపడ్డారు.

ఒంగోలు,జూన్ 20:రాబోయే కాలంలో 30 సంవత్సరాలపాటు జగన్ పాలన రాష్ట్రంలో రానుందని వైకాపా రాష్టమ్రహిళా అధ్యక్షురాలు, నగరి శాసన సభ్యురాలు ఆర్‌కె రోజా జోస్యం చెప్పారు. వైకాపా ప్రకాశం జిల్లా ప్లీనరీ సమావేశం మాజీ మంత్రి బాలినేని అధ్యక్షతన ఒంగోలులో మంగళవారం జరిగింది. ఈ ప్లీనరీకి ముఖ్యఅతిధిగా హాజరైన రోజా మట్లాడుతూ జగన్‌మోహన్‌రెడ్డిని ముఖ్యమంత్రిగా చేయాలని అన్నివర్గాల ప్రజలు కోరుకుంటున్నట్లు తెలిపారు.

విశాఖపట్నం, జూన్ 20: బంగాళాఖాతంలో విదర్భ నుంచి దక్షిణ తమిళనాడు మధ్య అల్పపీడన ద్రోణి ఏర్పడినట్టు విశాఖ తుపాను హెచ్చరికల కేంద్రం మంగళవారం రాత్రి తెలియచేసింది. దీని ప్రభావం వలన కోస్తాలో అక్కడడక్కడ చెదురు మదులు జల్లులు పడే అవకాశం ఉంది. మిగిలిన చోట్ల పొడి వాతావరణమే ఉంటుందని తుపాను హెచ్చరికల కేంద్రం అధికారులు తెలిపారు.

విజయనగరం, జూన్ 20: కాపులకు రిజర్వేషన్ విషయంలో చావోరేవో తేల్చుకుంటామని కాపు ఉద్యమనేత ముద్రగడ పద్మనాభం స్పష్టం చేశారు. ముఖ్యమంత్రి చంద్రబాబునాయుడు ఎన్నికల సమయంలో హామీ ఇచ్చినప్పటికీ దాని గురించి నేటి వరకు పట్టించుకోలేదని ఆగ్రహం వ్యక్తం చేశారు.