అమరావతి, జూన్ 8: తన నిధులతో రాష్ట్ర ప్రభుత్వాలు అమలు చేస్తున్న వివిధ సంక్షేమ పథకాలను ఆయా ప్రభుత్వాలు తమ సొంతవిగా ప్రచారం చేసుకుంటున్నందున, ఇకపై తానే విస్తృతంగా వాటిని ప్రచారం చేసుకోవాలని కేంద్రంలోని నరేంద్ర మోదీ ప్రభుత్వం నిర్ణయించింది. ఆ మేరకు సాంకేతిక పరిజ్ఞానాన్ని పూర్తి స్థాయిలో వినియోగించుకుని, ప్రచారంతో పల్లెలలో పాగా వేయాలని భావిస్తోంది.

గుంటూరు, జూన్ 8: పొగాకు పంటను జిఎస్‌టి పరిధిలోకి తీసుకువచ్చి అదనంగా 5 నుంచి 28 శాతం పన్నును విధించాలన్న కేంద్రప్రభుత్వ నిర్ణయం పొగాకు రైతులపై ప్రతికూల ప్రభావాన్ని చూపనుందని, తక్షణం జిఎస్‌టి నుంచి పొగాకును మినహాయించాలని ఇండియన్ టుబాకో అసోసియేషన్.. కేంద్ర ఆర్థికశాఖ మంత్రి అరుణ్‌జైట్లీకి విజ్ఞప్తిచేసింది.

విజయవాడ, జూన్ 8: రాష్టప్రతి ఎన్నికలకు నోటిఫికేషన్ వెలువడిన దృష్ట్యా జూలై 15, 16 తేదీల్లో విశాఖపట్నంలో జరగాల్సిన భారతీయ జనతాపార్టీ జాతీయ కార్యవర్గ సమావేశాలు వాయిదా వేసినట్లు ఆ పార్టీ రాష్ట్ర అధ్యక్షుడు డాక్టర్ కంభంపాటి హరిబాబు గురువారం ఒక ప్రకటనలో తెలిపారు. సమావేశాలు జరిగే తేదీని త్వరలో ప్రకటిస్తామన్నారు.

కూచిపూడి, జూన్ 7: ప్రపంచ ప్రఖ్యాతిగాంచిన కూచిపూడి నాట్యంలో గిరిజన విద్యార్థులకు శిక్షణ ఇప్పించేందుకు రాష్ట్ర గిరిజన సంక్షేమ శాఖ ప్రణాళిక రూపొందిస్తున్నట్లు ఆ శాఖ ప్రత్యేక కమిషనర్ డాక్టర్ ఎం పద్మ తెలిపారు. కూచిపూడి నాట్యారామం, రాష్ట్ర, భాష, సాంస్కృతిక శాఖల సంయుక్త ఆధ్వర్యంలో నాట్యక్షేత్రం కృష్ణాజిల్లా కూచిపూడిలో నిర్వహిస్తున్న కూచిపూడి నాట్య గురుశిక్షణ కార్యక్రమాలను ఆమె బుధవారం పరిశీలించారు.