అమరావతి, డిసెంబర్ 29: రాష్ట్రంలో వివిధ ప్రాజెక్టులు, పలు అభివృద్ధి పనుల కోసం శరవేగంగా భూమిని సమీకరించాలని ప్రభుత్వం నిర్ణయించింది. పోర్టులు, రోడ్లు, జలమార్గాలు, బీచ్ కారిడార్, తదితర ప్రాజెక్టులకు నిర్ణయించిన ప్రకారం భూసమీకరణ జరపాలని ప్రభుత్వం కలెక్టర్లకు ఆదేశాలు జారీ చేసింది. ఆయా జిల్లాల్లో భూముల ధరలు, స్థానిక పరిస్థితుల ఆధారంగా భూసమీకరణ, లేక భూసేకరణ చేయనున్నారు.

అనంతపురం, డిసెంబర్ 29: రాష్ట్రంలో రానున్న వేసవిలో తాగునీటి సమస్యను సమర్థవంతంగా ఎదుర్కొనేందుకు రూ.120 కోట్లు ఖర్చు చేయనున్నామని పంచాయతీరాజ్, ఆర్‌డబ్ల్యు ఎస్, ఎంజిఎన్‌ఆర్‌ఇజిఎస్ శాఖల మంత్రి అయ్యన్నపాత్రుడు తెలిపారు. అనంతపురం నగరంలో గురువారం ఆయన విలేఖరులతో మాట్లాడుతూ వచ్చే ఏడాది జనవరి నుంచి జూన్ వరకు 13 జిల్లాల్లో తాగునీటి ఎద్దడిని ఎదుర్కోవడానికి ప్రణాళిక రూపొందించామన్నారు.

హైదరాబాద్, డిసెంబర్ 29: ఆంధ్ర థర్మల్ విద్యుత్ ప్రాజెక్టుల్లో ఉత్తమ టెక్నాలజీ విధానాలను అమలు చేసి నాణ్యమైన ఉత్పత్తిని చేసినందుకు ఏపి జెన్కో సిఎండి కె విజయానంద్‌కు, ఇంధన సంరక్షణ పద్ధతుల్లో అత్యుత్తమ విధానాలను అవలంభించినందుకు ఇంధన సంరక్షణ సంఘం సిఇవోఎ చంద్రశేఖర రెడ్డికి కేంద్రం అవార్డులను ప్రకటించింది.

రాజమహేంద్రవరం, డిసెంబర్ 29: గోదారి జిల్లాల్లో రబీ నాట్లకు నోట్ల దెబ్బ తగిలింది. చిల్లర నోట్లు ఉంటేనే పనుల్లోకి వస్తామని కూలీలు రైతులకు చెప్తుండటంతో దాదాపు సగం విస్తీర్ణంలో నాట్లు మందగించాయి. ప్రస్తుతం అత్యధికంగా రూ.2000 నోట్లు మాత్రమే చెలామణీలో ఉండగా, రూ.500 నోట్లు ఎవరికీ అందుబాటులో లేవు.