హైదరాబాద్, సెప్టెంబర్ 22: ఎన్నికల్లో ఇచ్చిన హామీలు నేరవేర్చకుండా రాష్ట్రంలో పరిపాలనా విధ్వంసానికి పాల్పడుతున్న ముఖ్యమంత్రి చంద్రబాబుపై ప్రజలే దండయాత్ర చేసే రోజులు సమీపించాయని వైకాపా సీనియర్ నేత భూమన కరుణాకరరెడ్డి విమర్శించారు. గురువారం ఇక్కడ ఆయన విలేఖర్ల సమావేశంలో మాట్లాడుతూ ఎన్నికల్లో గెలిచేందుకు ఆరు వందల హామీలను ఇచ్చిన చంద్రబాబు కాపులను, రైతులను మోసం చేశారన్నారు.

విశాఖపట్నం, సెప్టెంబర్ 22: పశ్చిమ మధ్య బంగాళాఖాతంలో కోస్తాంధ్ర తీరాన్ని ఆనుకుని ఏర్పడిన అల్పపీడనం గురువారం మరింత బలపడింది. వాయుగుండంగా మారే అవకాశం లేనప్పటికీ, అల్పపీడన ప్రభావంతో రానున్న 24 గంటల్లో కోస్తాంధ్రలో చాలా చోట్ల వర్షం కురుస్తుందని విశాఖలోని తుపాను హెచ్చరికల కేంద్రం అధికారులు గురువారం రాత్రి తెలిపారు. ఒకటి, రెండు చోట్ల భారీ వర్షం కురిసే అవకాశం ఉంది.

గుంటూరు, సెప్టెంబర్ 22: ఒకవైపు జోరువాన.. మరోవైపు ముంచెత్తిన వరదనీరు.. కుటుంబసభ్యులతో పాటు వరదనీటిలో కొట్టుకుపోతున్న అతనికి తాటిచెట్టే జీవనాధారమైంది. అదే అదనుగా చెట్టుపైకి ఎక్కి దాదాపు 8 గంటలకు పైగా ప్రత్యక్ష నరకాన్ని చవిచూసి మృత్యుంజయుడుగా నిలిచాడు..

గుంటూరు : వాగులో చిక్కుకున్న ఆర్టీసీ బస్సులోని ప్రయాణికులు సురక్షితంగా బయటపడ్డారు. క్రోసూరు మండలంలో గురువారం వూటుకూరు వాగు దాటుతున్న సమయంలో ఒక్కసారిగా వరదనీరు ముంచెత్తడంతో బస్సు మధ్యలో నిలిచిపోయింది. అధికారులు తొలుత హెలికాప్టర్‌ సాయంతో బాధితులను రక్షించేందుకు ప్రయత్నం చేశారు. అయితే స్థానికుల సాయంతో తాడు ద్వారా వారిని పోలీసులు సురక్షితంగా బయటకు తీసుకొచ్చారు.