గుంటూరు, సెప్టెంబర్ 21: రాష్ట్రంలో పెండింగ్‌లో ఉన్న మున్సిపల్ ఎన్నికలపై తెలుగుదేశం పార్టీ దృష్టి సారించింది. ఇటీవల ప్రజాభిప్రాయ సేకరణ అనంతరం ప్రజలతో మమేకం కావాలని అధిష్ఠానం పార్టీశ్రేణులకు ఆదేశాలిచ్చింది. అంతేకాదు సభ్యత్వ నమోదు, నామినేటెడ్ పదవుల భర్తీకి కసరత్తు ప్రారంభించింది. సభ్యత్వ నమోదులో ఇప్పటివరకు దేశంలోనే ఏ పార్టీకి లేని బలం టిడిపికి ఉంది.

గుంటూరు: రాష్ట్ర టీడీపీ కార్యాలయంలో బుధవారం లోకేష్‌ అధ్యక్షతన పార్టీ ముఖ్య నేతల సమావేశం ప్రారంభమైంది. పార్టీ సభ్యత్వ నమోదు, నామినేటెడ్‌ పోస్టుల భర్తీ, పార్టీలో చేరికలపై ప్రధానంగా చర్చించనున్నారు.

తిరుపతి: ఎర్రచందనం అంతర్రాష్ట్ర స్మగ్లర్ గుణశేఖర్‌ను టాస్క్‌ఫోర్స్ బుధవారం అరెస్ట్ చేసింది. దాదాపు 200 టన్నుల ఎర్రచందనాన్నిగుణశేఖర్‌ తరలించినట్టు పోలీసులు గుర్తించారు. తమిళనాడులోని తిరువల్లూరు జిల్లా గుమ్మడిపూడి మాజీ ఎమ్మెల్యే వేణుకు గుణశేఖర్ ప్రధాన అనుచరుడిగా తెలుస్తోంది. ఎర్రచందనం స్మగ్లింగ్ సొమ్ముతో రాజకీయంగా ఎదిగేందుకు గుణశేఖర్ యత్నించినట్లు పోలీసులు తెలిపారు.

ఆదోని, సెప్టెంబర్ 20: కర్నాటకలోని తుంగభద్ర జలాశయంపై ఆధారపడిన కర్నాటక, ఆంధ్రప్రదేశ్‌లోని ఆయకట్టు రైతుల పరిస్థితి ఈసారి మరీ అధ్వాన్నంగా తయారైంది. జలాశయానికి ఈసారి 50 టిఎంసిల నీరు మాత్రమే వచ్చి చేరింది. తుంగభద్ర జలాశయం చరిత్రలో ఇంత తక్కువ పరిణామంలో వరద నీరు రావడం ఇదే మొదటిసారి. జలాశయంలో అనుకున్న మేరకు నీరు లేకపోవడంతో 10 రోజులకు ఒక్కసారి తుంగభద్ర కాల్వలకు నీరు విడుదల చేయాలని నిర్ణయించారు.