విశాఖ : విశాఖలో రెండో రోజు బ్రిక్స్ సదస్సు గురువారం ప్రారంభమైంది. పట్టణాల్లో మౌలిక వసతుల కల్పనకు ఆర్థిక వనరుల సమీకరణపై సదస్సులో చర్చించనున్నారు. బ్రిక్స్ దేశాల్లో స్మార్ట్ సిటీలపై ప్రజెంటేషన్ ఇచ్చారు.

విశాఖ: రాష్ట్రంలోని అన్ని మున్సిపాలిటీల్లో ఈ- కార్యాలయాలు ఏర్పాటు చేయనున్నట్లు పురపాలక శాఖ మంత్రి నారాయణ గురువారం వెల్లడించారు. ‘పురసేవ’ యాప్‌ ద్వారా ప్రజా సేవలను మెరుగు పరుస్తామని పేర్కొన్నారు. విశాఖలోని జీవీఎంసీ కార్యాలయం నుంచి 110 మున్సిపాలిటీల కమిషనర్లతో మంత్రి ఈరోజు సమీక్ష నిర్వహించారు.

శ్రీకాకుళం: : వంగర మండల పరిధిలోని మద్దువలస జలాశయం నుంచి గురువారం నాలుగు గేట్లు ఎత్తి 8వేల క్యూసెక్కుల నీటిని నాగావళి నదిలోకి విడుదల చేసినట్లు జలాశయం డీఈ పద్మజ తెలిపారు. జలాశయంలోకి స్వర్ణముఖి, వేగావతి నదుల ద్వారా 6వేల క్యూసెక్కుల నీరు రావడంతో ప్రస్తుతం జలాశయ నీటి మట్టం 63.9మీటర్లుగా నమోదైనట్లు తెలిపారు. ప్రాజెక్టు దిగువ భాగంలోని గ్రామస్థులు అప్రమత్తంగా ఉండాలని డీఈ సూచించారు.

కడప : కడప జిల్లా బద్వేలులో గురువారం ఎర్రచందనం దుంగలను తరలిస్తున్న 14 మంది తమిళ కూలీలను ఫారెస్ట్‌ అధికారులు, పోలీసులు అరెస్ట్‌ చేశారు. లక్కవారిపల్లె ప్రాంతంలో తమిళకూలీలు ఎర్రచందనం చెట్లను నరికి దుంగలు తరలిస్తున్నట్లు సమాచారం రావడంతో పోలీసులు అక్కడికి వెళ్లి 15 ఎర్రచందనం దుంగలను స్వాధీనం చేసుకున్నారు.