హైదరాబాద్ : ఆంధ్రప్రదేశ్ రాజధాని అమరావతి అభివృద్ధి పనులకు ప్రభుత్వం స్విస్‌ చాలెంజ్‌ విధానాన్ని ఎంచుకోవడాన్ని సవాలు చేస్తూ, హైకోర్టులో దాఖలైన పిటిషన్‌పై హైకోర్టు ఇవాళ విచారణ చేపట్టింది. మంగళవారం వరకు తమకు సమయం కావాలని ఏపీ సర్కార్‌ కోరింది. చివరిక్షణంలో సమయం అడగడం సమంజసంగా లేదని వ్యాఖ్యానించిన స్విస్ చాలెంజ్ కేసు విచారణను హైకోర్టు సోమవారానికి వాయిదా వేసింది.

విజయవాడ: ఓటుకు నోటు కేసు భయంతోనే ముఖ్యమంత్రి చంద్రబాబు మౌనంగా ఉంటున్నారని ఏపీసీసీ అధ్యక్షుడు ఎన్. రఘువీరారెడ్డి శుక్రవారం అన్నారు. కేంద్రం అనుమతి లేకుండా తెలంగాణ, మహారాష్ట్ర ప్రభుత్వాలు ఎలా ఒప్పందం కుదుర్చుకుంటాయని ప్రశ్నించారు. పోలవరం ప్రాజెక్టును రాష్ట్రప్రభుత్వం కేంద్ర ప్రభుత్వానికి అప్పగించాలని, విభజన చట్టం ప్రకారం ప్రాజెక్ట్‌ నిర్మాణ బాధ్యత కేంద్రానిదేనని రఘువీరా అన్నారు.

తిరుమల: కృష్ణాష్టమికి మరుసటి రోజున ఉట్లోత్సవాన్ని నిర్వహించడం ఆనవాయితీగా తిరుమలలో ఉట్లోత్సవం కార్యక్రమం శుక్రవారం ఘనంగా జరిగింది. ముందుగా శ్రీవారి ఆలయం నుంచి మలయప్పస్వామి, మరో బంగారు తిరుచ్చిపై శ్రీకృష్ణస్వామివారు తిరువీధుల్లో వూరేగింపుగా హథీరాంజీ మఠం వద్దకు చేరుకున్నారు. ఉత్సవమూర్తులకు కర్పూర హారతులు సమర్పించి ఉట్లోత్సవం ప్రారంభించారు. ఉట్టిని పగులగొట్టడానికి యువకులు పోటీపడ్డారు.

గుంటూరు : తాడేపల్లి మండలం కుంచనపల్లి వద్ద శుక్రవారం వేకువజామున లారీ, ఆటో ఢీకొన్నాయి. ఈ రోడ్డుప్రమాదంలో ఇద్దరు అక్కడికక్కడే మృతి చెందగా మరికొందరు తీవ్రంగా గాయపడ్డారు. వీరిని చికిత్స నిమిత్తం విజయవాడ తరలిస్తుండగా మార్గమధ్యంలో ఒకరు, చికిత్స పొందుతూ మరొకరు మృతిచెందారు. ఈ ప్రమాద సమాచారం అందుకొని ఘటనా స్థలానికి వెళ్తున్న పోలీసు వాహనాన్ని మరో జీపు ఢీకొంది. హెడ్ కానిస్టేబుల్‌కు గాయాలయ్యాయి.