విజయవాడ : పోలవరం ప్రాజెక్టు నిర్మాణ పనులు కేంద్రానికి అప్పగించేందుకు సిద్ధంగా ఉన్నామని ముఖ్యమంత్రి చంద్రబాబు నాయుడు గురువారం పేర్కొన్నారు. దుర్గా ఘాట్‌ కమాండ్‌ కంట్రోల్‌ రూమ్‌ నుంచి డ్రోన్ల ద్వారా పోలవరం పనులను ఆయన పరిశీలించారు. అనంతరం ఆయన మాట్లాడుతూ, పోలవరం ప్రాజెక్టు పనులను ఇకపై ప్రతి నెల ప్రాజెక్టు పనులు పరిశీలిస్తానని, ప్రాజెక్టు కోసం కేంద్రం రూ.1700 కోట్లు ఇవ్వాలన్నారు.

శ్రీకాకుళం : దివంగత ముఖ్యమంత్రి వైఎస్‌ రాజశేఖరరెడ్డి కుటుంబం నుంచి తనను వేరు చేయడానికే కొన్ని పత్రికల యాజమాన్యాలు కుట్ర పన్నుతున్నాయని వైఎస్‌ఆర్‌సీపీ రాష్ట్ర ప్రధాన కార్యదర్శి ధర్మాన ప్రసాదరావు గురువారం ఆరోపించారు. అవాస్తవ కథనాలతో వైఎస్‌ఆర్‌సీపీని బలహీన పర్చాలనుకుంటున్నారని ధర్మాన మండిపడ్డారు.

తిరుపతి: మితిమీరిన అభిమానం హింసకు దారితీయడం సహించరానిదని, అభిమానం ఉండాలే కానీ చంపుకునేంత స్థాయికి వెళ్లడం మంచిది కాదని హీరో, జనసేన అధినేత పవన్‌ కల్యాణ్ హితవు అన్నారు. అభిమాని వినోద్ కుటుంబాన్ని గురువారం పరామర్శించిన అనంతరం పవన్ మీడియాతో మాట్లాడారు. హీరోల మధ్య పోటీ తత్వమే ఉంటుంది తప్ప ఇలాంటి గొడవకు దారితీయడం బాధాకరమన్నారు.

ఏలూరు: ఏలూరులో గురువారం ఉదయం అటవీశాఖ అధికారులు నకిలీ ఎర్రచందనం తరలిస్తున్న 3 వాహనాలను సీజ్‌ చేసి, నలుగురిని అరెస్ట్‌ చేశారు.