విజయవాడ: కృష్ణానది పుష్కరాల సందర్భంగా చేపట్టిన పనుల్లో నాణ్యత లోపిస్తే సంబంధిత కాంట్రాక్టర్లను బ్లాక్‌లిస్ట్‌లో పెడతామని ఎపి సిఎం చంద్రబాబు మరోసారి హెచ్చరించారు. నిన్న పుష్కర ఘాట్లను తనిఖీ చేసిన ఆయన ఈరోజు అధికారులతో సమీక్ష జరిపారు. సీతానగరం వద్ద పనులు చేపట్టిన కాంట్రాక్టర్ తీరు మార్చుకోవాలని ఆయన అల్టిమేటం ఇచ్చారు. ఘాట్ల వద్ద ఎలాంటి ఇబ్బందులు తలెత్తకుండా నిర్మాణాలు జరగాలన్నారు.

విజయవాడ: ఏపీలో ఐఏఎస్‌ అధికారులను బదిలీ చేస్తూ ఉత్తర్వులు జారీ చేశారు. విశాఖ కలెక్టర్‌గా ప్రవీణ్‌కుమార్‌, నెల్లూరు కలెక్టర్‌గా ముత్యాలరాజు, విశాఖ మున్సిపల్‌ కమిషనర్‌గా హరినారాయణ , చిత్తూరు జాయింట్‌ కలెక్టర్‌గా గిరీశ్‌ షా, పాడేరు ఐటీడీఏ ఇన్‌ఛార్జి పీడీగా శివశంకర్‌లను ప్రభుత్వం బదిలీ చేసింది.

దిల్లీ: కాంగ్రెస్‌ పార్టీ తన ఉనికిని కాపాడుకునేందుకే ప్రైవేటు బిల్లు ప్రవేశపెట్టిందని కేంద్రమంత్రి సుజనాచౌదరి ఆరోపించారు. ఆప్‌ సభ్యుడిపై చర్చకు కాంగ్రెస్‌ సహకరించి ఉంటే గంటన్నర తర్వాత ప్రైవేటు బిల్లుపై చర్చకు అవకాశం వచ్చేదన్నారు. గందరగోళం సృష్టించి సభ వాయిదా పడేలా కాంగ్రెస్‌ చేసిందన్నారు.

దిల్లీ: ఎపికి ప్రత్యేకహోదా కోసం తమ పార్టీ ఎంపీ కెవిపి రామచంద్రరావు రాజ్యసభలో ప్రవేశపెట్టిన ప్రైవేటు బిల్లుకు బిజెపి వ్యతిరేకంగా ఓటు వేస్తే ఆ పార్టీకి మనుగడ కష్టమేనని కాంగ్రెస్ ఎంపీ చిరంజీవి అన్నారు. రాజ్యసభకు హాజరుకావాలని కాంగ్రెస్ పార్టీ విప్ జారీ చేయడంతో ఆయన సినిమా షూటింగ్ వాయిదా వేసుకుని హుటాహుటిన దిల్లీ చేరుకున్నారు. రాజకీయాలకు అతీతంగా అన్ని పార్టీలూ ప్రైవేటు బిల్లుకు సహకరించాలన్నారు.