విజయవాడ, జూలై 17: అమరావతి ప్రజా రాజధాని అంటూ ఏపీ సర్కారు చెబుతున్న మాటలు అక్షర సత్యాలు కాబోతున్నాయి. ముఖ్యమంత్రి చంద్రబాబు నాయుడు మొదటి నుంచి చెబుతున్నట్టుగా అమరావతి అంటే విద్య, వైద్యం, ఆరోగ్యం, వినోదం, పరిశ్రమలు.. అన్నీ కలబోతగా ఉండాలన్న లక్ష్యం దిశగా ఇప్పుడు ప్రభుత్వం వడివడిగా అడుగులు వేస్తోంది. అమరావతిలో విద్యాసంస్థల భూకేటాయింపులకు ఇప్పటికే మంత్రివర్గం ఆమోద ముద్ర వేసింది.

గన్నవరం, జూలై 17: అమెరికా వెళ్లిన తన భర్త జాడ తెలియజేయాలని భార్య కృష్ణా జిల్లా గన్నవరం పోలీసులను ఆశ్రయించింది. గన్నవరానికి చెందిన పాస్టర్ వీరపనేని జాన్సన్ చౌదరి(44) జూన్ 4న అమెరికా వెళ్లాడు. జూలై 15న అమెరికా నుండి తిరిగి రావాల్సి ఉంది. అయితే ఆయన ఈనాటి వరకు ఇంటికి చేరుకోలేదని అతని భార్య సుభాషిణి గన్నవరం స్టేషన్‌లో ఫిర్యాదు చేసింది. దీనిపై గన్నవరం పోలీసులు కేసు నమోదు చేశారు.

రాజమహేంద్రవరం, జూలై 17: గోదావరి నది ఎడమ గట్టుపై మరో ఎత్తిపోతల పథకానికి శ్రీకారం చుట్టారు. సుమారు రూ.350 కోట్ల ప్రాథమిక అంచనాతో ఈ పథకాన్ని రూపొందించారు. దీంతో ఏలేరు ప్రాజెక్టు కింద 90వేల ఆయకట్టుకు స్థిరీకరణ కానుంది. జల వనరుల శాఖ మంత్రి దేవినేని ఉమామహేశ్వరరావు ఆదివారం రాజమహేంద్రవరంలో ఈ ఎత్తిపోతల పథకం ప్రకటించారు.

హైదరాబాద్, జూలై 17: ఆంధ్రప్రదేశ్ రాష్ట్ర రాజధానిగా అమరావతి పేరు బహుళ ప్రాచుర్యంలోకి తీసుకువచ్చేందుకు ముఖ్యమంత్రి చంద్రబాబు సర్కార్ చేస్తున్న కృషి అంతా ఇంతాకాదు. కాని అమరావతి గ్రామ పంచాయితీ అభివృద్ధికి అంతంత మాత్రంగానే నిధులు విదుల్చుతున్నారని అమరావతి డెవలప్‌మెంట్ అథారిటీ చైర్మన్ జాస్తి వీరాంజనేయులు అన్నారు. కృష్ణ పుష్కరాలు సమీపిస్తున్నా, ఇంతవరకు అభివృద్ధి పనులు నత్తనడకన సాగుతున్నాయన్నారు.