విజయవాడ, జూలై 1: రాజధాని అమరావతి నిర్మాణానికి కేంద్రం సాయం చేస్తుందని కొండంత ఆశలు పెట్టుకున్న ఆంధ్రప్రదేశ్ ప్రభుత్వానికి నిరాశే మిగిలింది. రాజధాని నిర్మాణానికి కేంద్రం అందించే సాయం పెద్దగా లేదని తేలిపోయింది. అమరావతికోసం కేంద్రం కేవలం 2500 కోట్ల రూపాయలు మాత్రమే ఇస్తానందని శుక్రవారం విలేఖరుల సమావేశంలో ముఖ్యమంత్రి చంద్రబాబు చెప్పారు. ఇప్పటికే ఇచ్చిన 1000 కోట్లు కూడా అందులో భాగమేనని ఆయన అన్నారు.

ఆదోని, జూలై 1: దేశంలో టెక్‌టైల్స్ పరిశ్రమ, జిన్నింగ్, ప్రెస్సింగ్ పరిశ్రమలకు అవసరమైన పత్తి ముడిసరుకు నిల్వలు నిండుకున్నట్లు తెలుస్తోంది. కేవలం 40 రోజులకు సరిపడ నిల్వలు మాత్రమే ఉన్నట్లు పత్తి వ్యాపారుల సంఘం అంచనా వేసింది. దీంతో పత్తి, దూది ధరలు అమాంతం పెరిగిపోయాయి. ధరల పెరుగుదల వ్యాపారవర్గాలను ఆందోళనకు గురిచేస్తోంది. నెల రోజుల క్రితం క్వింటాల్ పత్తి ధర రూ.4 వేల నుంచి రూ.4,500 వరకు ఉండేది.

విజయవాడ: చైనా పర్యటన ముగించుకుని వచ్చిన ఎపి సిఎం చంద్రబాబు ఈ నెల 10 నుంచి రష్యాలో పర్యటిస్తారు. రాష్ట్రానికి పెట్టుబడులను ఆకర్షించడమే ధ్యేయంగా ఆయన ఇటీవలి కాలంలో పలు దేశాల్లో పర్యటిస్తున్నారు. రష్యాలో జరిగే అంతర్జాతీయ ఎయిర్ షోలో ఆయన పాల్గొనే అవకాశం ఉంది.

తిరుమల: గతంలో ఎన్నడూ లేని విధంగా శ్రీవారి ఆర్జిత సేవ టికెట్లను తితిదే విడుదల చేసింది. 1,09,092 సేవా టికెట్లను ఆగస్టు, సెప్టెంబర్‌ నెలల కోసం అంతర్జాలంలో అందుబాటులో ఉంచింది. 26,600 సహస్ర దీప అలంకరణ, 12,476 సుప్రభాత సేవ, 2,952 నిజపాద సేవ, 24,080 వసంతోత్సవ టికెట్లను అంతర్జాలంలో వుంచారు.