విజయవాడ: రాష్ట్ర విభజన జరిగి రెండేళ్లు పూర్తయినప్పటికీ పోలీసు శాఖలో సిబ్బంది కొరత తీవ్రంగానే ఉందని ఎపి డిజిపి జెవి రాముడు సోమవారం ఇక్కడ మీడియాకు తెలిపారు. హైదరాబాద్ నుంచి పోలీసు శాఖలోని పలు విభాగాలను ఇంకా తరలించాల్సి ఉందని, ఎపిఎస్పీకి 3వేల మంది ఇంకా రావాల్సిఉందని చెప్పారు. పోలీసు శాఖలో వివిధ స్థాయిల్లో ఆరువేల ఉద్యోగాలను భర్తీ చేసేందుకు ప్రభుత్వం అనుమతి ఇచ్చిందన్నారు.

కర్నూలు: నోటిదురుసుతో మాట్లాడుతున్న వైకాపా అధ్యక్షుడు జగన్‌కు మహిళలు గరిటెలతో వాతలు పెట్టాలని డిప్యూటీ సిఎం కెఈ కృష్ణమూర్తి అన్నారు. ఆయన సోమవారం ఇక్కడ జరిగిన నవనిర్మాణ దీక్షలో మాట్లాడుతూ, సంస్కారం లేని జగన్ ముఖ్యమంత్రి చంద్రబాబుపై అవాకులు చవాకులు పేలుతున్నందున ఇక మహిళలే అతనికి బుద్ధి చెప్పాలన్నారు.

దిల్లీ: ఇరిగేషన్ ప్రాజెక్టులపై ఎపి అభ్యంతరాలపై తమ వాదన వినిపించేందుకు తెలంగాణ నీటిపారుదల శాఖ మంత్రి హరీష్‌రావు నేతృత్వంలో ప్రత్యేక బృందం సోమవారం ఇక్కడికి చేరుకుంది. ఈరోజు సాయంత్రం ఈ బృందం కేంద్ర జలవనరుల మంత్రి ఉమాభారతిని కలుస్తుంది. హరీష్ రావు వెంట తెలంగాణ ఎంపీలు, నీటి పారుదల శాఖ నిపుణులు ఉన్నారు.

విజయవాడ: నవ్యాంధ్ర రాజధాని అమరావతికి ఎపి సచివాలయ ఉద్యోగుల తరలింపులో ప్రస్తుతం అయోమయ పరిస్థితి నెలకొందని ఎపి సెక్రటేరియట్ ఉద్యోగుల సంఘం నేత మురళీకృష్ణ అన్నారు. ఈ నెల 27 నాటికి ఉద్యోగుల తరలింపు ప్రక్రియ పూర్తవుతుందని సిఎం చెబుతున్నారని, వివిధ శాఖల ఉద్యోగుల తరలింపుపై నిర్దిష్ట విధానాన్ని ఈరోజు ప్రకటిస్తారని వార్తలు వెలువడుతున్నాయని దీంతో గందరగోళం నెలకొందని ఆయన అన్నారు.