నెల్లూరు, మే 21: నెల్లూరు నగరపాలక సంస్థ స్టాండింగ్ కమిటీ ఎన్నికలు రసాభాసగా మారాయి. పోలింగ్ ప్రారంభం కాకముందే వైఎస్‌ఆర్ కాంగ్రెస్ పార్టీ సభ్యులు బ్యాలెట్ పేపరుపై అంకెలు వేయడంతో తీవ్రంగా వ్యతిరేకించారు. ఎన్నికల అధికారి కమిషనర్ వెంకటేశ్వర్లు జోక్యం చేసుకుని నిబంధనల ప్రకారమే పోలింగ్ జరుపుతున్నామని చెప్పడంతో దీనిపై వైఎస్‌ఆర్ కాంగ్రెస్ పార్టీ సభ్యులు మండిపడ్డారు.

గుంటూరు: నిజాంపట్నం ఓడరేవు నుంచి ఈనెల 16న సముద్రంపైకి చేపల వేటకు వెళ్లిన ఏడుగురు మత్స్యకారుల ఆచూకీ ఇంతవరకూ తెలియరాలేదు. వారు వేటకు వెళ్లిన తర్వాత బంగాళాఖాతంలో తుపాను ఏర్పడింది. సముద్రం అల్లకల్లోలంగా మారింది. తీరం వెంబడి బలమైన ఈదురుగాలులు వీచాయి. తుపాను సమయంలో వీరు సముద్రంలో కొట్టుకుపోయి ఉంటారని స్థానికులు అనుమానిస్తున్నారు. వారి ఆచూకీ తెలియక కుటుంబ సభ్యులు ఆందోళన చెందుతున్నారు.

ఒంగోలు: ఇక్కడ శనివారం ప్రారంభమైన టిడిపి మినీ మహానాడు సభలో ఆ పార్టీకి చెందిన కరణం బలరాం, గొట్టిపాటి రవికుమార్ వర్గీయులు పరస్పరం ఘర్షణకు దిగారు. దీంతో పోలీసులు జోక్యం చేసుకుని పరిస్థితిని చక్కదిద్దారు. పార్టీ పరిశీలకుడిగా వచ్చిన గోరంట్ల బుచ్చయ్య చౌదరి ఇరువర్గాలను శాంతింపజేశారు. మంత్రులు రావెల కిశోర్‌బాబు, శిద్ధా రాఘవరావు పాల్గొన్నారు.

విజయవాడ: ఎపి ఎంసెట్ మెడికల్ విభాగంలో ఫస్ట్ ర్యాంకు సాధించిన కర్నూలు జిల్లాకు చెందిన హేమలతను సిఎం చంద్రబాబు అభినందించారు. శనివారం మెడికల్ ఎంట్రన్స్ ఫలితాలను ప్రకటించిన సందర్భంగా విజయవాడలో ఉన్న హేమలత సిఎంను కలవగా ఆయన అభినందించారు.