విశాఖ: బ్రాండిక్స్ కార్మికులకు కనీస వేతనాన్ని పదివేల రూపాయలకు పెంచాలని వైకాపా అధినేత జగన్ డిమాండ్ చేశారు. ఆందోళన చేస్తున్న కార్మికులకు మద్దతుగా ఆయన బుధవారం బ్రాండిక్స్ వద్ద మాట్లాడుతూ, నెలరోజుల్లోగా వేతనాలు పెంచకుంటే తాను నిరవధిక దీక్ష చేస్తానన్నారు. సిఎం చంద్రబాబు పర్యటన సందర్భంగా ఇక్కడి కార్మికులపై లాఠీచార్జి చేయడం దారుణమన్నారు.

విజయవాడ: బిసిల హక్కులను పరిరక్షించేందుకు త్వరలో ఒక రాజకీయ పార్టీని ప్రారంభిస్తానని టిడిపి ఎమ్మెల్యే ఆర్.కృష్ణయ్య బుధవారం ఇక్కడ తెలిపారు. బిసిలకు ఏభైశాతం రిజర్వేషన్లు కల్పించాలని, లక్ష కోట్లతో కేంద్ర నిధి ఏర్పాటు చేయాలన్నారు. కాపులను బిసి జాబితాలో చేరిస్తే తాము సహించేది లేదన్నారు. బిసిల కోసం పోరాడితే సినీనటుడు పవన్‌కల్యాణ్‌కు తాము మద్దతిస్తామన్నారు.

గుంటూరు: ఎపికి అన్యాయం జరగని రీతిలో తెలంగాణలో ఇరిగేషన్ ప్రాజెక్టులను చేపట్టవచ్చని టిడిపి అధికార ప్రతినిధి, మాజీ మంత్రి డొక్కా మాణిక్య వరప్రసాద్ అన్నారు. ఆయన బుధవారం ఇక్కడ విలేఖరులతో మాట్లాడుతూ, రెండు తెలుగురాష్ట్రాల మధ్య నీటి వివాదాలను కేంద్రం పరిష్కరించాలన్నారు. కమీషన్ల కోసమే ఇపుడు తెలంగాణ సర్కారు పాలమూరు పథకానికి జీవోలు జారీ చేస్తోందన్నారు.

శ్రీకాకుళం: ఎపి సిఎం చంద్రబాబు ఒకరోజు పర్యటనకు బుధవారం ఇక్కడికి వచ్చారు. ఇక్కడి కోడి రామ్మూర్తి స్టేడియంలో జరిగే నీరు-ప్రగతి సమీక్షా సమావేశంలో ఆయన పాల్గొంటారు. శ్రీకాకుళం అసెంబ్లీ నియోజకవర్గంలో పలు అభివృద్ధి పనులను శంకుస్థాపనలు, ప్రారంభోత్సవాలు చేస్తారు. అనంతరం పార్టీ కార్యకర్తల సమావేశంలో పాల్గొని ఈరోజు రాత్రి ఇక్కడే బసచేస్తారు. గురువారం ఉదయం ఆయన విజయనగరం జిల్లా పర్యటకు వెళతారు.