హైదరాబాద్: రాష్ట్ర ప్రభుత్వ అప్రజాస్వామిక నిర్ణయాలకు నిరసనగా ఈనెల 23న అన్ని జిల్లాల్లోనూ కొవ్వొత్తుల ర్యాలీలు జరపాలని వైకాపా నిర్ణయించింది. కరవు, నీటి సమస్యపై మే 2న మండల, జిల్లా కేంద్రాల్లో ధర్నాలు చేస్తామని వైకాపా నేత బొత్స సత్యనారాయణ గురువారం తెలిపారు. విశాఖలో టిడిపి యువనేత లోకేష్, కేంద్ర మంత్రి వెంకయ్య నాయుడు భూములను దోచుకుంటున్నారని ఆరోపించారు.

కాకినాడ: ఎపి అసెంబ్లీలో విపక్ష నేతగా ఉన్న వైకాపా అధినేత వైఎస్ జగన్ ఆ పదవిని త్వరలోనే కోల్పోవడం తథ్యమని రాష్ట్ర ఆర్థికమంత్రి యనమల రామకృష్ణుడు గురువారం మీడియా సమావేశంలో జోస్యం చెప్పారు. జగన్ నిరంకుశ వైఖరి నచ్చకే వైకాపా ఎమ్మెల్యేలు టిడిపిలో చేరుతున్నారని, ఈ వలసలు ఇంకా ఎక్కువై ప్రతిపక్ష నేత హోదాను జగన్ కోల్పోకతప్పదన్నారు.

విశాఖ: విశాఖ జిల్లా రూరల్ ఎస్పీ కె.ప్రవీణ్ సమక్షంలో గురువారం ఉదయం మావోయిస్టు పార్టీ సభ్యురాలు ఝాన్సీ, మిలీషియా సభ్యులు లక్ష్మయ్య, అప్పారావు లొంగిపోయారు. ఝాన్సీపై పోలీసులు ఇదివరకే 4 లక్షల రూపాయల రివార్డు ప్రకటించారు.

గుంటూరు: మద్యం తాగిన కొద్ది సేపటికే ఇద్దరు మరణించిన ఘటన అమరావతి మండలం పునుగోడులో గురువారం ఉదయం జరిగింది. ఉదయం ఏడు గంటల ప్రాంతంలో కాటంరాజు (55), నీలయ్య (36) మద్యం సేవించి కాసేపటికే అపస్మారక స్థితిలో పడిపోయారు. స్థానికులు ఆస్పత్రికి తరలిస్తుండగా ఇద్దరూ మరణించారు. వీరు అతిగా తాగడం వల్ల మరణించరా? లేక మద్యంలో కల్తీ జరిగిందా? అనే విషయాలపై అధికారులు విచారణ జరుపుతున్నారు.