కర్నూలు, మార్చి 27: రాష్ట్ర శాసనసభలో ప్రధాన ప్రతిపక్ష పార్టీ అయిన వైకాపాలో చీలిక తీసుకువచ్చేందుకు పావులు శరవేగంగా కదులుతున్నాయి. ఆ పార్టీ నుంచి 23 మందికి పైగా ఎమ్మెల్యేలను బయటకు తీసుకువచ్చేందుకు అధికార తెలుగుదేశం పార్టీ నేతలు ప్రయత్నాలు ముమ్మరం చేశారు. ఇందులో భాగంగా కర్నూలు జిల్లాకు చెందిన ముగ్గురు ఎమ్మెల్యేలతో సంప్రదింపులు పూర్తయ్యాయని టిడిపి నేతల ద్వారా తెలుస్తోంది.

సింహాచలం, మార్చి 27: శ్రీ వరాహలక్ష్మీనృసింహస్వామి వారి దేవాలయంతో పాటు 108 దేవాలయాల్లో తొలి పూజలు అందుకునే పూసపాటిరాజు వంశీయుల వారసులెవరన్న దానిపై ఆసక్తికరమైన చర్చ మొదలైంది. ధర్మకర్తగా ఎవరు బాధ్యతలు స్వీకరిస్తే వారి పేరున తొలి పూజ చేయడం సంప్రదాయంగా వస్తోంది. ఆనందగజపతిరాజు మరణించడంతో ధర్మకర్త పీఠం అధిష్ఠించేదెవరన్న అంశం తేలాల్సి ఉంది. ఈ వ్యవహారంపై దేవస్థానం కసరత్తు ప్రారంభించింది.

విశాఖపట్నం, మార్చి 27: మధ్యప్రదేశ్, కర్నాటక మీదుగా దక్షిణ తమిళనాడు వరకూ అల్పపీడన ద్రోణి ఆదివారం విస్తరించి ఉంది. ఇది సోమవారం నాటికి ప్రస్తుతం ఉన్న ప్రాంతం నుంచి కదిలే అవకాశం ఉందని విశాఖలోని తుపాను హెచ్చరికల కేంద్రం ఆదివారం రాత్రి తెలిపింది. దీని ప్రభావం వల్ల రానున్న 48 గంటల్లో ఉత్తర కోస్తా జిల్లాల్లో అక్కడక్కడ వర్షం కురిసే అవకాశం ఉంది.

మార్కాపురం, మార్చి 27: వక్ఫ్‌బోర్డు ఆస్తుల పరిరక్షణ కోసం ప్రత్యేక కమిషన్ ఏర్పాటు చేసినట్లు రాష్ట్ర ఐటి, సమాచార, ముస్లిం మైనార్టీ శాఖల మంత్రి పల్లె రఘునాథరెడ్డి తెలిపారు. ప్రకాశం జిల్లా మార్కాపురంలో ఆదివారం ఆయన విలేఖర్లతో మాట్లాడుతూ రాష్ట్రంలో ముస్లిం మైనార్టీల సంక్షేమం కోసం బడ్జెట్‌లో 716 కోట్ల 54 లక్షల 80 వేల రూపాయలను కేటాయించినట్లు తెలిపారు.