విశాఖపట్నం: విశాఖ ఆర్‌కే బీచ్ యుద్ధ విమానాల ఘోషతో అదిరిపోయింది. బాంబుల మోతతో దద్దరిల్లింది. తుపాకీ శబ్దాలతో మార్మోగింది. దూసుకుపోతున్న మిసైళ్లు.. తీరానికి దగ్గరగా వచ్చి నైపుణ్యాన్ని ప్రదర్శించిన హెలికాప్టర్లు.. ఒకటేమిటి. నిజంగా యుద్ధ భూమిలో ఉన్నామా? అన్నట్టున్నాయి ఫ్లీట్ రివ్యూ ముగింపు సన్నివేశాలు.

కాకినాడ-కాపు సామాజికవర్గాన్ని బిసి జాబితాలో చేరుస్తూ జీవో విడుదల చేయాలన్న లక్ష్యంతో ఆమరణదీక్ష చేస్తున్న ముద్రగడకు సంఘీభావం చెప్పదల్చుకున్నవారు ఎక్కడికక్కడ ఆ పని చేయాలేతప్ప కిర్లంపూడికి రావద్దని తూర్పుగోదావరి జిల్లా ఎస్.పి. రవిప్రకాశ్ కోరారు. జిల్లాలో శాంతిభద్రతల సమస్య ఉందని, తునిలాంటి సంఘటనలు జరగకుండా చూడాల్సిన బాధ్యత తమపై ఉందని, అందువల్ల కిర్లంపూడికి వచ్చి ఇబ్బందులు సృష్టించవద్దని ఆయన కోరారు.

హైదరాబాద్-కాపులకు బిసి రిజర్వేషన్ కల్పించాలని కోరుతూ ఆమరణదీక్ష చేపట్టిన మాజీమంత్రి ముద్రగడ పద్మనాభంకు సంఘీభావం తెలిపేందుకు వైకాపా సీనియర్ నేతలు కిర్లంపూడి వెళ్లనున్నారు. వైకాపా బృందంలో బొత్స సత్యనారాయణ, ఉమ్మారెడ్డి వెంకటేశ్వర్లుతోపాటు మరికొందరు కాపునేతలు ఉంటారు.

హైదరాబాద్-దుమ్ముగూడెం ప్రాజెక్టు రీడిజైన్‌కు తెలంగాణ మంత్రిమండలి ఆమోదం తెలిపింది. అలాగే ఉద్యానవనశాఖలో ఖాళీలను త్వరలో భర్తీ చేయాలని, కాంట్రాక్టు ఉద్యోగులను పర్మినెంట్ చేయాలని నిర్ణయించింది. ఆదివారం మధ్యాహ్నం తెలంగాణ కేబినెట్ భేటీ అయి పలు నిర్ణయాలు తీసుకుంది. మంత్రిమండలి నిర్ణయాలను మంత్రులు పోచారం, హరీష్‌రావు విలేకరుల సమావేశంలో వివరించారు.