తిరుపతి : తిరుపతి పద్మావతి అమ్మవారి కార్తీక బ్రహ్మోత్సవాలు అంగరంగ వైభవంగా జరుగుతున్నాయి. రెండవరోజు అమ్మవారు పెద్ద శేష వాహనంపై ఊరేగారు. అమ్మవారిని దర్శించుకోవటానికి భక్తులు అధిక సంఖ్యలో వచ్చారు. ఏడుపడగల వాహనంపై సర్వాలంకార భూషితయైన అమ్మవారు భక్తులకు అభయప్రదానం చేశారు.

విజయవాడ:2018 నాటికి పోలవరం సాగునీటి ప్రాజెక్టును పూర్తిచేస్తామని ఎపి సిఎం చంద్రబాబు చెప్పారు. ఆయన బుధవారం మంత్రులు, ఇరిగేషన్ అధికారులతో టెలీ కాన్ఫరెన్స్ నిర్వహించి పోలవరం పనుల తీరును తెలుసుకున్నారు. నీరు-ప్రగతి కార్యక్రమాన్ని ప్రజలందరూ ముందుకు తీసుకెళ్ళాలని ఆయన పిలుపునిచ్చారు. కరువు రహిత రాష్ట్రంగా ఎపిని తీర్చిదిద్దేందుకు అందరూ కృషిచేయాలన్నారు.

విశాఖ:పాడేరు ఏజెన్సీలో ఉష్ణోగ్రతలు కనిష్ఠ స్థాయికి చేరుకుంటున్నాయి. ఉదయం 9 గంటల సమయంలో కూడా మంచు కురుస్తున్నందున రహదారులు కన్పించడంలేదు. లంబసింగి, మినుములూరులో 9 డిగ్రీలు, పాడేరులో 11, చింతపల్లిలో 12 డిగ్రీల ఉష్ణోగ్రతలు నమోదయ్యాయి.

శ్రీకాకుళం:ఇక్కడి ట్రెజరీ శాఖలో సీనియర్ అసిస్టెంట్‌గా పనిచేస్తున్న యలమంచిలి భారతీలక్ష్మికి చెందిన ఆస్తులపై బుధవారం ఉదయం ఏసిబి అధికారులు సోదాలు ప్రారంభించారు. శ్రీకాకుళం, విశాఖ, హైదరాబాద్‌లలో ఆమె ఆస్తులపై ఏకకాలంలో దాడులు చేసి భారీ స్థాయిలో అక్రమాస్తులు వున్నట్లు కనుగొన్నారు. ఒక్క శ్రీకాకుళంలోనే ఆమెకు కోటి రూపాయల మేరకు ఆస్తులున్నట్లు కనుగొన్నారు.