గుంటూరు, అక్టోబర్ 11: భారతదేశం గర్వించదగ్గ న్యాయ కోవిదుడు పాటిబండ్ల చంద్రశేఖరరావు అని తెలుగుదేశం పార్టీ రాజ్యసభ సభ్యుడు కనకమేడల రవీంద్రకుమార్ కొనియాడారు. పాటిబండ్ల చంద్రశేఖరరావు మృతి పట్ల ఎంపీ కనకమేడల నివాళులర్పించి ప్రగాడ సంతాపం తెలిపారు. పాటిబండ్ల మృతితో దేశం ఒక గొప్ప న్యాయకోవిదుడిని కోల్పోయిందని పేర్కొన్నారు.

విజయవాడ, అక్టోబర్ 11: సమస్యల పరిష్కారం కోసం గత 8 రోజులుగా సాగుతున్న మున్సిపల్ కార్మికులు చేపట్టిన నిరవధిక సమ్మె రోజురోజుకు తీవ్రరూపం దాల్చుతోంది. తెనాలి, తాడేపల్లిగూడెంల్లో కార్మికులపై లాఠీచార్జీ చేయడాన్ని కార్మికసంఘాల జేఏసీ ఖండించింది. లాఠీచార్జీకి కారకులైన అధికారులు, పోలీసులపై చట్టపరమైన చర్యలు తీసుకోవాలని డిమాండ్ చేసింది.

తెనాలి: కాంగ్రెస్ పార్టీ నాయకుడు, ఉమ్మడి రాష్ట్ర శాసనసభ స్పీకర్ నాదేండ్ల మనోహర్ కాంగ్రెస్ పార్టీకి రాజీనామా చేశారు. పార్టీలో కీలక నేతగా ఉన్న ఆయన తెనాలి శాసనసభ నుంచి రెండు సార్లు ఎన్నికయ్యారు. మాజీ ముఖ్యమంత్రి కిరణ్‌కుమార్ రెడ్డి హయాంలో స్పీకర్‌గా పనిచేశారు. నాదేండ్ల మనోహర్ జనసేన పార్టీలో రేపు తిరుపతిలో అధికారికంగా చేరనున్నారు.

విజయవాడ: దసరా ఉత్సవాల్లో భాగంగా అమ్మవారు ఈరోజు బాలా త్రిపుర సుందరిగా దర్శనం ఇచ్చారు. అమ్మవారు మూడు సంవత్సరాల బాలికా రూపంలో దర్శనం ఇచ్చారు. ఈ రూపంలో ఉన్న అమ్మవారిని దర్శించుకోవటం ద్వారా అన్ని పనులు నెరవేరతాయని భక్తుల నమ్మకం. తొలిరోజు 80వేల మంది భక్తులు అమ్మవారిని దర్శనం చేసుకోగా రెండవరోజు భక్తులు రద్దీ తగ్గింది.