విశాఖపట్నం, జూలై 15: బంగాళాఖాతంలో ఒడిశాను ఆనుకుని ఏర్పడిన తీవ్ర అల్పపీడనం స్థిరంగా కొనసాగుతోందని విశాఖ తుపాను హెచ్చరికల కేంద్రం అధికారులు వెల్లడించారు. దీని ప్రభావం వలన వచ్చే 24 గంటల్లో ఉత్తర కోస్తా అంటతా వర్షాలు కురిసే అవకాశం ఉంది. ఈ తీవ్ర అల్పపీడనం పశ్చిమ దిశగా కదులుతూ మధ్య భారత దేశం వైపు వెళుతోందన్నారు. తీరం వెంబడి గంటకు 45 నుంచి 50 కిలో మీటర్ల వేగంతో గాలులు కొనసాగనున్నాయి.

విజయవాడ(పాతబస్తీ), జూలై 14: కృష్ణానదీ తరంగాలపై ప్రపంచ స్థాయి ఎఫ్ 1 హెచ్2ఓ గ్రాండ్ స్పీడ్ బోటు పవర్ రేసింగ్ పోటీలు జరగనున్నాయని ఆంధ్రప్రదేశ్ పర్యాటక శాఖ ఎండి హిమాన్షు శుక్లా తెలిపారు. శనివారం విజయవాడ బరంపార్క్‌లోని పున్నమి కాన్ఫరెన్స్ హాలులో జరిగిన విలేఖర్ల సమావేశంలో ఆయన ఈ వివరాలు వెల్లడించారు. నవంబర్ 15, 16, 17 తేదీల్లో మూడు రోజుల పాటు స్పీడ్ బోటు రేసులు జరగనున్నాయన్నారు.

విజయవాడ, జూలై 14: గుజరాత్ రాష్ట్రంలోని వడోదర, తదితర ప్రాంతాల్లో ఇటీవల అభివృద్ధి చేసిన అత్యాధునిక బస్ స్టేషన్‌లు ఆదర్శంగా రాష్ట్రంలోని బస్ స్టేషన్‌లను ఆధునీకరించి ప్రయాణికులకు మెరుగైన సౌకర్యాలు కల్పించే యత్నం చేస్తామని ఏపీఎస్ ఆర్టీసీ చైర్మన్ వర్ల రామయ్య అన్నారు. తొలి దశలో విజయవాడ, తిరుపతి, విశాఖలకు ప్రాధాన్యత నిస్తామంటునే ఈ ఆధునికరణ ప్రైవేట్ భాగస్వామ్యంతోనే సాధ్యపడగలదన్నారు.

విశాఖపట్నం, జూలై 14: జాతీయ ప్రాజెక్టుగా గుర్తించి కేంద్రమే నిధులు మంజూరు చేస్తున్న పోలవరం ప్రాజెక్టు విషయంలో ముఖ్యమంత్రి చంద్రబాబు జోక్యమేమిటని బీజేపీ ఎమ్మెల్సీ సోము వీర్రాజు ప్రశ్నించారు. విశాఖలోని పార్టీ కార్యాలయంలో శనివారం ఏర్పాటు చేసిన విలేఖరుల సమావేశంలో ఆయన మాట్లాడుతూ కేంద్రమే పూర్తి బాధ్యతతో పోలవరం ప్రాజెక్టును అనుకున్న ప్రకారం పూర్తి చేసేందుకు కట్టుబడి ఉందన్నారు.