ముంబయి, జనవరి 22: దేశీయ స్టాక్ మార్కెట్లు వరుసగా నాలుగో సెషన్ లాభాల్లో ముగిశాయి. విదేశీ నిధులు పెద్ద మొత్తంలో స్టాక్ మార్కెట్‌లోకి తరలి రావడంతో పాటు దేశీయ మదుపరులు ఎడతెరిపి లేకుండా కొనుగోళ్లకు పూనుకోవడంతో మార్కెట్ కీలక సూచీలు సోమవారం సరికొత్త రికార్డు గరిష్ఠ స్థాయిల వద్ద ముగిశాయి. రిలయన్స్ ఇండస్ట్రీస్, ఓఎన్‌జీసీ, టీసీఎస్ వంటి బ్లూచిప్ కంపెనీల షేర్లు ఎక్కువగా మదుపరులను ఆకర్షించాయి.

హైదరాబాద్, జనవరి 22: మన దేశంలో పెట్టుబడులు పెట్టేందుకు కొరియాకు చెందిన అనేకమంది పారిశ్రామికవేత్తలు అసక్తిగా ఉన్నారని తెలంగాణ ప్రభుత్వ సలహాదారు జి. వివేక్ తెలిపారు. రాష్ట్రంలో పెట్టుబడులు పెట్టేందుకు ఉన్న అనుకూల పరిస్థితుల గురించి కొరియాలో పారిశ్రామికవేత్తలకు వివరించినట్లు ఆయన చెప్పారు. పెట్టుబడులు పెట్టేవారికి రాష్ట్ర ప్రభుత్వం కల్పించిన సౌకర్యాల గురించి వివరించినట్లు తెలిపారు.

లక్నో, జనవరి 22: వివాదాస్పద హిందీ చలనచిత్రం ‘పద్మావత్’ను ఉత్తరప్రదేశ్‌లో నిషేధించాలని కర్ణిసేన పోషకుడు లోకేంద్రసింగ్ కల్వీ ఆ రాష్ట్ర ముఖ్యమంత్రి యోగి ఆదిత్యనాథ్‌ను ఇక్కడ సోమవారం కలిసిన సందర్భంగా విజ్ఞప్తి చేశారు. ఈ సినిమాను యుపీలో విడుదల చేస్తే థియేటర్లలో ప్రజలే ‘జనతా కర్ఫ్యూ’ను అమలు చేస్తారని ఆయన ప్రకటించారు.

సత్యవేడు/తడ, జనవరి 22: అమెరికాకు చెందిన వివిధ రకాల రుచులు, సువాసన పరిమళాలు తయారుచేసే ఇంటర్నేషనల్ ఫ్లేవర్స్ అండ్ ఫ్రాగ్నెన్సన్ (ఐఎఫ్‌ఎఫ్) నూతన పరిశ్రమ నిర్మాణానికి సోమవారం శ్రీసిటీలో భూమిపూజ జరిగింది. శ్రీసిటీ ఎండీ రవీంద్రసన్నారెడ్డి, జిల్లా పరిశ్రమల కేంద్రం జాయింట్ డైరెక్టర్ అనిల్‌కుమార్‌రెడ్డి ఈ కార్యక్రమంలో పాల్గొని ఐఎఫ్‌ఎఫ్ పరిశ్రమ ప్రతినిధులకు ఈ సందర్భంగా అభినందనలు తెలిపారు.