ముంబయి, మే 12: ఈ నెల 5వ తేదీతో ముగిసిన వారంలో విదేశీ ద్రవ్య నిల్వలు అంతకు ముందు వారంకన్నా 2.985 బిలియన్ డాలర్లు పెరిగి గతంలో ఎన్నడూ లేనంతగా 375.71 మిలియన్ డాలర్లకు చేరుకున్నాయని రిజర్వ్ బ్యాంక్ ఒక ప్రకటనలో తెలిపింది. ఇంతకు ముందు వారంలో విదేశీ ద్రవ్య నిల్వలు 1.594 బిలియన్ డాలర్లు పెరిగి 372.73 బిలియన్ డాలర్లుగా ఉండినట్లు ఆ ప్రకటన తెలిపింది.

న్యూఢిల్లీ, మే 12: ప్రజలకు తక్కువ ధరలో నాణ్యమైన మందులను అందుబాటులోకి తీసుకురావాలన్న ప్రణాళికలో భాగంగా దేశంలోని దాదాపు 1000 ప్రధాన రైల్వే స్టేషన్లలో జన ఔషధి దుకాణాలను ప్రారంభించాలని యోచిస్తున్నట్లు కేంద్ర ప్రభుత్వం వెల్లడించింది. జన ఔషధి దుకాణాల నెట్‌వర్క్‌ను మరింతగా విస్తరించేందుకు వివిధ రాష్ట్రాల్లోని బస్టాండ్లలో కూడా ఇటువంటి దుకాణాలను ప్రారంభించాలని యోచిస్తున్నట్లు ప్రభుత్వం పేర్కొంది.

న్యూఢిల్లీ, మే 12: ఆహార వస్తువులతో పాటుగా ఉత్పాదక ఐటంల ధరలు తగ్గుముఖం పట్టడంతో ఏప్రిల్ నెలలో ద్రవ్యోల్బణం తగ్గింది. శుక్రవారం ప్రభుత్వం విడుదల చేసిన గణాంకాల ప్రకారం ఏప్రిల్ నెలలో టోకు ధరల ఆధారిత ద్రవ్యోల్బణం నాలుగు నెలల కనిష్టస్థాయి అయిన 3.85 శాతానికి తగ్గింది. అలాగే వినియోగ ధరల సూచీ ఆధారిత ద్రవ్యోల్బణం సైతం 2.99 శాతానికి పడిపోయింది.

హైదరాబాద్, మే 12: నగరానికి చెందిన బిజినెస్ సొల్యూషన్ ప్రొవైడర్ జిజికె టెక్ ఉప్పల్‌లోని ఎరెనా సెజ్‌లో శుక్రవారం అత్యాధునిక సదుపాయాలతో కూడిన కార్యాలయాన్ని ప్రారంభించింది. ఐటి ప్రిన్సిపల్ సెక్రటరీ జయేష్ రంజన్ చేతుల మీదుగా ప్రారంభమైన ఈ కార్యాలయం ద్వారా వెయ్యి మందికి ఉద్యోగాలు లభిస్తాయని ఆ సంస్థ ప్రకటించింది.