న్యూఢిల్లీ, నవంబర్ 1: సబ్సిడీ వంట గ్యాస్ (ఎల్‌పిజి) ధరలు స్వల్పంగా పెరిగాయి. 14.2 కిలోల సిలిండర్ ధరను 2.05 రూపాయల చొప్పున మంగళవారం చమురు మార్కెటింగ్ సంస్థలు పెంచాయి. గడచిన ఐదు నెలల్లో ఈ పెంపు ఆరోసారి అవగా, తాజా పెంపుతో ఢిల్లీలో సబ్సిడీ ఎల్‌పిజి సిలిండర్ ధర 430.64 రూపాయలకు చేరింది. ఇంతకుముందు ఇది 428.59 రూపాయలుగా ఉంది. ఇదిలావుంటే విమానయాన ఇంధనం (ఎటిఎఫ్) ధర కూడా పెరిగింది.

హైదరాబాద్, నవంబర్ 1: పౌరులకు సేవలందించడంలో పారదర్శకత, జవాబుదారీతనం తేవడంలో భాగంగా కేంద్రం ఈ-ఆఫీసుల ఏర్పాటుకు పెద్దపీట వేస్తోందని, 2018 మార్చి నాటికి అన్ని ప్రభుత్వ శాఖల్లో, విభాగాల్లో కాగితం ప్రమేయం లేకుండా సేవలు అందించేందుకు చర్యలు తీసుకుంటున్నామని పాలన సంస్కరణలు-ప్రజా సమస్యల విభాగం (డిఓఏఆర్‌పిజి) కార్యదర్శి సి విశ్వనాథ్ తెలిపారు.

కొత్తగూడెం, అక్టోబర్ 31: సింగరేణిలోని భూగర్భ గనులు నష్టాల బాటలో పయనిస్తున్నాయి. మొత్తం 11 ఏరియాల్లోని భూగర్భ గనుల్లో భూపాలపల్లి పరిధిలో ఉన్న కెటికె-2 గని మినహా మిగిలిన వాటిలో కనీసం కార్మికుల వేతనాలు కూడా సమకూరడం లేదు. ఈ పరిస్థితిని అధిగమించాలంటే గనుల్లో యంత్రాల పని గంటలు పెంచాలనే నిర్ణయానికి యాజమాన్యం వచ్చింది.

న్యూఢిల్లీ, అక్టోబర్ 31: ఈ ఏడాది సెప్టెంబర్ నెలలో వౌలిక రంగం వృద్ధిరేటు 3 నెలల గరిష్ఠాన్ని తాకుతూ 5 శాతాన్ని చేరింది. సిమెంట్, ఉక్కు, రిఫైనరీ ఉత్పత్తుల పనితీరు బాగుండటమే ఇందుకు కారణం. ఎనిమిది కీలక రంగాలైన బొగ్గు, ముడి చమురు, సహజ వాయువు, రిఫైనరీ ఉత్పత్తులు, ఎరువులు, ఉక్కు, సిమెంట్, విద్యుత్ రంగాల్లో వృద్ధిరేటు నిరుడు సెప్టెంబర్‌లో 3.7 శాతంగా నమోదైంది.