జైపూర్, డిసెంబర్ 23: వరసగా రెండో త్రైమాసికంలో సైతం జిడిపి గణాంకాలు మెరుగుపడ్డంపై సంతోషం వ్యక్తం చేసిన నీతి ఆయోగ్ చైర్మన్ అరవింద్ పనగరియ ఈ ఆర్థిక సంవత్సరం దేశ ఆర్థిక వ్యవస్థ 8 శాతానికి పైగా వృద్ధి చెందుతుందన్న ఆశాభావాన్ని వ్యక్తం చేసారు. ఈ ఏడాది తొలి ఆరునెలల్లో జిడిపి వృద్ధి 7.2 శాతంగా ఉండగా, ఆర్థిక సంవత్సరం చివరినాటికి ఇది 8 శాతాన్ని దాటవచ్చని భావిస్తున్నట్లు పనగరియ చెప్పారు.

విజయవాడ, డిసెంబర్ 23: దేశంలో ఖనిజ ఆధారిత పరిశ్రమల స్థాపనకు రెండవ అనుకూల రాష్ట్రంగా ఆంధ్రప్రదేశ్‌కు ప్రపంచ బ్యాంకు గుర్తింపు లభించిందని భూగర్భ, ఖనిజ వనరుల శాఖ కార్యదర్శి యం.గిరిజా శంకర్ పేర్కొన్నారు. 2016 జనవరి, 10 నుండి 12 వరకు విశాఖపట్నంలో పారిశ్రామిక శిఖరాగ్ర ప్రచార కార్యక్రమాన్ని నిర్వహిస్తున్నామన్నారు.

ముంబయి, డిసెంబర్ 23: విదేశీ మార్కెట్ల సానుకూల సంకేతాలతో పాటు అద్భుతంగా ఉన్న అమెరికా గణాంకాల నేపథ్యంలో దేశీయ స్టాక్ మార్కెట్లు బుధవారం భారీ లాభాలతో ముగిసాయి. బిఎస్‌ఇ సెనె్సక్స్ 260 పాయింట్లు వృద్ది చెందగా జాతీయ స్టాక్ ఎక్స్‌చేంజి సూచీ నిఫ్టీ సైతం 80 పాయింట్లు లాభపడింది. డిసెంబర్ 3 తర్వాత అంటే దాదాపు 3 వారాల తర్వాత ప్రధాన సూచీలు ఇంత గరిష్ఠస్థాయిని తాకడం ఇదే మొదటిసారి.

రాజమండ్రి, డిసెంబర్ 22: రైళ్ల వేగాన్ని పెంచడానికి వీలుగా దువ్వాడ-విజయవాడ రైలు మార్గాన్ని మరింత పటిష్టపరిచామని దక్షిణ మధ్య రైల్వే జనరల్ మేనేజర్ రవీంద్రగుప్త చెప్పారు. వార్షిక తనిఖీల్లో భాగంగా మంగళవారం దువ్వాడ నుండి రాజమండ్రి వరకు రైల్వే స్టేషన్లు, వివిధ విభాగాల్లో తనిఖీలు నిర్వహించిన అనంతరం రాజమండ్రిలో విలేఖర్లతో ఆయన మాట్లాడారు.