చికాగో, సెప్టెంబర్ 9: భారత్ నవ నిర్మాణంలో ప్రవాస భారతీయులు కీలకపాత్ర వహించేందుకు కేంద్రం అన్ని చర్యలు తీసుకుంటుందని బీజేపీ నేత అమన్ సిన్హా చెప్పారు. గత ప్రభుత్వాలతో పోల్చితే, బీజేపీ ప్రభుత్వం ఎన్‌ఆర్‌ఏల సేవలను విస్తృత స్ధాయిలో వినియోగించుకోవాలన్న నిర్ణయంతో ఉందన్నారు. దీని నిమిత్తం ప్రణాళికను కూడా రూపొందించిందన్నారు. భారత్ అభివృద్ధికి ప్రవాస భారతీయులు ముందుకు రావాలన్నారు.

హౌస్టన్, సెప్టెంబర్ 8: మూడేళ్ల పెంపుడు కుమార్తె షేరీన్ మ్యాథ్సూ మృతి కేసులో ఇండో అమెరికన్ దంపతుల తీరుపై కఠినంగా వ్యవహరించాలని భారత ప్రభుత్వం నిర్ణయించింది. వెస్లీ మ్యాథ్స్యూ, అతని భార్య సినీకి సంబంధించి ఓవర్సీస్ సిటిజన్‌షిప్ ఆఫ్ ఇండియా కార్డులను రద్దు చేయాలని నిర్ణయించినట్లు హౌస్టన్ కౌనె్సల్ జనరల్ ఆఫ్ ఇండియా అనుపమ్ రే చెప్పారు. ఈ పాప డల్లాస్‌లో ఇంటి నుంచి తప్పిపోయింది.

బాండంగ్, సెప్టెంబర్ 8: ఇండోనేసియాలో ఘోర ప్రమాదం చోటుచేసుకుంది. జావా ద్వీపంలో ఓ టూరిస్టు బస్సు లోయలోపడి 21 మంది దుర్మరణం చెందారు. పశ్చిమ జావాలోని బోగోర్ నుంచి ఓ కంపెనీ ఉద్యోగులను తీసుకెళ్తున్న బస్సు లోయలో బోల్తాపడింది. బస్సు సుకాబుని జిల్లాకు వెళ్తుండగా ఈ ప్రమాదం జరిగిందని అధికారులు తెలిపారు. ప్రమాదంలో 21 మంది చనిపోగా, తొమ్మిది మంది తీవ్రంగా గాయపడ్డారని వెల్లడించారు.

ఖాట్మండు, సెప్టెంబర్ 8: ఏడుగురు ప్రయాణిస్తున్న ఓ హెలికాప్టర్ శనివారం నేపాల్‌లో కుప్పకూలింది. ఈ సంఘటనలో ఒక విదేశీయుడుసహా ఆరుగురు మృతి చెందారు. అత్యంత ఆశ్చర్యకరంగా ఓ మహిళ ప్రాణాలతో బయటపడింది. ఆల్టిట్యూట్ ఎయిర్ సంస్థకు చెందిన ఈ హెలికాప్టర్ శనివారం ఉదయం గోర్ఖాలోని సమాగున్ నుంచి బయలుదేరింది. అయితే, 32 కిలోమీటర్లు ప్రయాణించిన తర్వాత ఖాట్మండు టవర్‌తో సిగ్నల్స్ కోల్పోయింది.