సింగపూర్, జూన్ 11: నెలల తరబడి ఎనలేని ఉద్రిక్తత... ఎదురుబడితే ఒకరినొకరు ఏం చేసుకుంటారోనన్న టెన్షన్... అమెరికా, ఉత్తర కొరియాల మధ్య సాగిన ఉద్రిక్తతలపై యావత్ ప్రపంచమే ఆందోళన చెందింది. అలాంటిది ఇరు దేశాలు శాంతి శకంలో అడుగుపెట్టబోతున్నాయి. అమెరికాతో చర్చలకు సిద్ధమంటూ ఉత్తర కొరియా ముందుకొచ్చింది. అందుకు అగ్రరాజ్యాధినేత డొనాల్డ్ ట్రంప్ కూడా ఆహ్వానం పలికారు.

నెలల తరబడి ఒకరంటే ఒకరికి పొసగని వైనం..ఆ ఇద్దరూ శాంతి మంత్రం జపిస్తూ సింగపూర్ వేదికగా కలుస్తున్నారు. అమెరికా అధ్యక్షుడు ట్రంప్, ఉత్తర కొరియా అధినేత కిమ్‌ల మధ్య మంగళవారం జరిగే చారిత్రక భేటీపైనే అందరి దృష్టి. సహకరిస్తే తాయిలాల వర్షమేనని అమెరికా ముందుగానే ప్రకటించింది. ప్రపంచ శాంతిపైనే ప్రభావం చూపించే ఈ శిఖరాగ్రం మలుపెటో వేచి చూడాల్సిందే!

సింగపూర్, జూన్ 10: అమెరికా అధ్యక్షుడు డోనాల్డ్ ట్రంప్, ఉత్తర కొరియా నియంత కిమ్ జోంగ్ ఉన్‌ల మధ్య మంగళవారం జరుగనున్న సమావేశం విజయవంతం కావాలని, శాంతికి బాటలు వేయాలని కోరుతూ పోప్ ఫ్రాన్సిస్ ప్రార్థనలు జరిపారు. ‘ఈ చర్చలు సానుకూల ఫలితాలనిచ్చి, భవిష్యత్తులో కొరియన్ ద్వీపకల్పంలో శాంతికి దోహదం చేయాలన్నదే నా ఆకాంక్ష’ అని పోప్ పేర్కొన్నారు.

జింగ్‌డావో (చైనా), జూన్ 10: భారత్, పాకిస్తాన్ దేశాల రాకతో షాంఘై సహకార సంస్థ బలోపేతమైందని, ప్రాంతీయ దేశాల అభివృద్ధికి శుభపరిణామమని చైనా అధ్యక్షుడు జిన్‌పింగ్ అన్నారు. షాంఘై సహకార సంస్ధ సదస్సులో ఈ రెండు దేశాలకు సభ్యత్వం కల్పించడంతో, సభ్యుల సంఖ్య ఎనిమిదికి పెరిగిందన్నారు. ప్రధాని నరేంద్ర మోదీ ఈ సదస్సుకు హాజరు కావడాన్ని చైనా అధ్యక్షుడు జింగ్‌పింగ్ హర్షం వ్యక్తం చేశారు.