యాంగాన్, సెప్టెంబర్ 6: భారత ప్రయోజనాల పరిరక్షణకు ఎంతటి కఠిన నిర్ణయాన్నైనా తీసుకునేందుకు వెనుకాడేది లేదని ప్రధాన మంత్రి నరేంద్ర మోదీ స్పష్టం చేశారు. పెద్దనోట్ల రద్దును గట్టిగా సమర్థించుకున్న ఆయన దేశ హితమే తమ లక్ష్యమని బుధవారంనాడిక్కడ భారత సంతతికి చెందినవారిని ఉద్దేశించి మాట్లాడుతూ అన్నారు.

సెయింట్స్‌జాన్స్, సెప్టెంబర్ 6: కరేబియన్ దీవులను ఇర్మా హరికేన్ పెనుతీవ్రతతో కుదిపేస్తోంది. బుధవారం ఉదయం సంభవించిన ఈ విలయం తాకిడికి ఆంటిగువా, బార్బుడా దీవుల్లోని ప్రజలు ప్రాణాలు అరచేతిలో పెట్టుకుని ఇళ్లనుంచి బైటికి పరుగులు పెట్టారు. ఈ వారాంతానికి ఈ పెనుతుపాను ఫ్లోరిడాను చేరుకునే అవకాశం ఉంటుందని నిపుణులు హెచ్చరిస్తున్నారు. ఇర్మా హరికేన్ అన్నది అత్యంత తీవ్రమైన అట్లాంటిక్ మహాసముద్ర తుపాను.

జియామెన్, సెప్టెంబర్ 5: ఉత్తర కొరియాపై దౌత్యపరమైన పరిష్కారం కుదరని పక్షంలో అది ప్రపంచానికే వినాశకారిగా మారుతుందని రష్యా అద్యక్షుడు వ్లాదిమిర్ పుతిన్ అన్నారు. అయితే ఉత్తరకొరియాపై మరిన్ని ఆంక్షలు విధించాలన్న అమెరికా డిమాండ్‌వల్ల ఎలాంటి ప్రయోజనం ఉండదని కూడా ఆయన అన్నారు. దీంతో ఉత్తర కొరియాను ఎలా అదుపు చేయాలన్న విషయంలో ఈ రెండు అగ్రరాజ్యాల మధ్య విభేదాలు మరింత సుస్పష్టమయ్యాయి.

జియామెన్, సెప్టెంబర్ 4: బ్రిక్స్ దేశాల ఆర్థిక, సాంకేతిక సహకార ప్రణాళికకు 76 మిలియన్ల అమెరికన్ డాలర్లను అందించేందుకు చైనా ముందుకు వచ్చింది. దీనితోపాటు అభివృద్ధి బ్యాంక్ కొత్త బ్లాక్‌ల ప్రాజెక్టులకోసం మరో నాలుగు మిలియన్ డాలర్లు ఇస్తామని చైనా అధ్యక్షుడు జీ జిన్‌పింగ్ సోమవారం తెలిపారు. అయిదు దేశాల బ్రిక్స్ సమైక్యంగా ప్రపంచ శాంతి, అభివృద్ధి కోసం కృషి చేయాలని ఆయన పిలుపునిచ్చారు.