ఇస్లామాబాద్, జూన్ 15: పనామా పేపర్స్ లీక్ కేసులో అవినీతి ఆరోపణలు ఎదుర్కొంటున్న పాకిస్తాన్ ప్రధాని నవాజ్ షరీఫ్ గురువారం ఈ వ్యవహారంపై దర్యాప్తు చేస్తున్న సంయుక్త దర్యాప్తు బృందం ఎదుట హాజరయ్యారు. తాను ఎలాంటి తప్పూ చేయలేదని, ప్రజాస్వామ్య బద్ధంగా ఎన్నికయిన తన ప్రభుత్వంపై కొంతమంది అజ్ఞాత శత్రువులు కుట్రలు పన్నుతున్నారని షరీఫ్ అన్నారు.

లండన్, జూన్ 14: పశ్చిమ లండన్‌లోని 24 అంతస్తుల ‘గ్రీన్‌ఫెల్ టవర్’లో బుధవారం సంభవించిన ఘోర అగ్నిప్రమాదంలో ఆరుగురు మృతి చెందారు. 50 మంది గాయపడ్డారు. మృతుల సంఖ్య మరింత పెరిగే అవకాశం ఉందని అధికారులు అందోళన చెందుతున్నారు. లాంచెస్టర్ వెస్ట్ ఎస్టేట్‌లోని లాటిమెర్ రోడ్డులో ఈ బహుళ అంతస్తు భవనం ఉంది. స్థానిక కాలమానం ప్రకారం 01:16 గంటలకు టవర్‌లో అగ్ని ప్రమాదం సంభవించింది.

గ్వాటెమాల, జూన్ 14: పశ్చిమ గ్వాటెమాలలోని మెక్సికో సరిహద్దులో తీవ్ర భూకంపం సంభవించింది. అనేక నగరాలకు భూ ప్రకంపనలు వ్యాపించాయి. భూకంప తీవ్రత రిక్టార్ స్కేలుపై 6.6గా నమోదైంది. ఒక వ్యక్తి గాయపడినట్టు సమాచారం అందిందని అధికారులు వెల్లడించారు. ఎలాంటి సునామీ హెచ్చరికలూ జారీ చేయలేదన్నారు. స్థానిక కాలమానం ప్రకారం ఉదయం 1:29కి భూమి కంపించిందని సాన్‌మార్కోస్‌లోని భూకంప పరిశోధన కేంద్రం తెలిపింది.

ఢాకా, జూన్ 13: భారీ వర్షాలు, వరదలతో బంగ్లాదేశ్ ఉక్కిరి బిక్కిరి అవుతోంది. ఎడతెరిపి లేకుండా కురుస్తున్న వర్షాల వలన ఆ దేశ ఉత్తర ప్రాంతంలో కొండ చరియలు విరిగిపడి దాదాపు 90 మంది మృతిచెందారు. వీరిలో ఇద్దరు సైనిక అధికారులు కూడా ఉన్నారని, మట్టిపెళ్లల కింద ఇంకా ఎంతోమంది చిక్కుకుని ఉన్నందున మృతుల సంఖ్య ఇంకా పెరిగే అవకాశం ఉందని అధికారులు మంగళవారం వెల్లడించారు.