చ.జుర్రెద మీ కథామృతము, జుర్రెద మీ పదకంజతోయమున్
జుర్రెద రామనామమున జొబ్బిలుచున్న సుధారసంబు నే
జుర్రెద జుర్రజుర్రఁగ రుచుల్ గనువారి పదంబుఁ గూర్పవే
తర్రులతోడి పొత్తిడక దాశరథీ కరుణాపయోనిధీ

చ.్భండనభీముఁడార్తజనబాంధవుఁడుజ్జ్వల బాణతూణకో
దండకళా ప్రచండ భుజతాండవకీర్తికి రామమూర్తికిన్
రెండవపాటిదైవమిఁక లేఁడనుచున్ గడకట్టి భేరికా
డాండడడాండడాండనినదంబులజాండము నిండ మత్తవే
దండమునెక్కి చాటెదను, దాశరథా కరుణాపయోనిధీ

చ.హలకులిశాంకుశధ్వజశరాసన శంఖ రథాంగ కల్పకో
జ్జ్వలజలజాత రేఖలను సాంకములై కనుపట్టుచున్న మీ
కలితపదాంబుజద్వయము గౌతమపత్ని కొసంగినట్లు నా
తలఁపునఁజేర్చి కావఁగదె దాశరథీ కరుణాపయోనిధీ

ఉ.చిక్కని పాలపై మిసిమి జెందిన మీగడ పంచదారతో
మెక్కిన భంగి మీవిమలమేచకరూపసుధారసంబు నా
మక్కువపళ్లెరంబున సమాహితదాస్యమనేటి దోయిటన్
దక్కెనటంచు జుర్రెదను దాశరథీ కరుణాపయోనిధీ