సీ. కోతికి జలతారు కుళ్ళాయి యేటికి?
విరజాజి పూదండ విధవకేల?
ముక్కిడి తొత్తుకు ముత్తెంపు నత్తేల?
అద్దమేమిటికి జాత్యంధునకును !
మాచకమ్మకు నేల వౌక్తిక హారముల్?
క్రూర చిత్తునకు సద్గోష్టులేల?
ఱంకుబోతుకునేల బింకంపు నిష్ఠలు
వాని యేటికి దుష్టవర్తనునకు?
తే॥ మాట నిలకడ సుంకరి మోటుకేల?
చెవిటివానికి సత్క్థా శ్రవణ మేల?

సీ. గార్దంబున కేల కస్తూరి తిలకంబు
మర్కటంబు నకేల మలయజంబు
శార్దూలమునకేల శర్కరాపూపంబు
సూకరంబునకేల చూత ఫలము
మార్జాలమునకేల మల్లెపువ్వుల బంతి
గుడ్లగూబకునేల కుండలములు
మహిషంబునకు నేల మంచి వస్త్రంబులు
బక సంతతికి నేల పంజరంబు
తే॥ ద్రోహచింతన జేసెడు దుర్జనులకు
మధురమైనట్టి నీనామ మంత్రమేల?
భూషణ వికాస శ్రీధర్మపురనివాస!

సీ. గౌతమీ స్నానాన ఁ గడతేరుదామంటే
మొనసి చన్నీళ్లలో మునుఁగలేను
తీర్థయాత్రల చేఁ గృతార్థుఁడౌదామంటే
బడలి నే మంబు నే నడవలేను
దాన ధర్మముల సద్గతి జెందుదమంటే
ఘనముగా నా వద్ద ధనములేదు
తపమాచరించి సార్థకత నొందుద మంటే
నిమిషమైన మనసు నిలువలేదు
తే. కష్టముల కోర్వ నా చేతఁగాదు నిన్ను
స్మరణ చేసేద నాయథాశక్తి కొలది
భూషణ వికాస శ్రీధర్మపుర నివాస!

సీ॥ చిత్తశుద్దిగ నీకు సేవ చేసెదఁగాని
పుడమిలో జనుల మెప్పులకు గాదు
జన్మ పావనతకై స్మరణఁ జేసెదఁగాని
సరివారిలోఁ బ్రతిష్ఠలకుఁ గాదు
ముక్తికోసము నేను మ్రొక్కి వేడ ఎదఁ గాని
దండి భాగ్యము నిమిత్తంబుగాదు
నిన్ను బొగడు విద్య నేర్చితినే కాని
కుక్షినింపెడి కూటి కొఱకుఁగాదు
తే. పారమార్థకమునకు వేఁ బాటుపడితి
కీర్తికి నపేక్ష పడలేదు కృష్ణవర్ణ!