కోస్తాకు వర్ష సూచన

విశాఖపట్నం, సెప్టెంబర్ 25: విదర్భ నుంచి దక్షిణ తమిళనాడుకు వరకూ ఏర్పడిన అల్పపీడనం, ఉపరితల ఆవర్తనం ఆదివారం కూడా స్థిరంగా కొనసాగుతున్నాయి. సముద్ర ఉపరితలానికి 7.6 కిలోమీటర్ల ఎత్తులో ఉపరితల ఆవర్తనం కొనసాగుతోందని విశాఖలోని తుపాను హెచ్చరికల కేంద్రం అధికారులు ఆదివారం రాత్రి తెలిపారు. దీని ప్రభావంతో రానున్న 24 గంటల్లో కోస్తాంధ్రలో చాలా చోట్ల వర్షం కురిసే అవకాశం ఉంది. ఇదే సమయంలో నైరుతి దిశగా గంటకు 45 నుంచి 50 కిలోమీటర్ల వేగంతో గాలులు వీస్తాయి. గడచిన 24 గంటల్లో చోడవరంలో అత్యధికంగా 11.2 సెంటీమీటర్లు, కొయ్యలగూడెంలో 7 సెం.మీ., వేపాడలో 5.2 సెంటీమీటర్ల వర్షపాతం నమోదైంది.