ఆసక్తికరం.. సూసైడ్ క్లబ్

ప్రవీణ యండమూరి, సాంకేత్, వెంకటకృష్ణ, చందన, శివ రామచంద్రవరపు ప్రధాన తారాగణంగా 3ఐ ఫిలింస్ సమర్పణలో రూపొందిస్తున్న చిత్రం ‘సూసైడ్ క్లబ్’. శ్రీనివాస్ బొగడపాటి దర్శకత్వంలో ప్రవీణ్ ప్రభు వెంకటేశన్, 3ఐ ఫిలింస్ సంయుక్తంగా రూపొందిస్తున్న ఈ చిత్రానికి సంబంధించిన అన్ని కార్యక్రమాలు పూర్తయ్యాయి. విడుదలకు సిద్ధమైంది. ఈ సందర్భంగా ఏర్పాటుచేసిన పాత్రికేయుల సమావేశంలో ట్రైల్ షోను నిర్వహించారు. అనంతరం దర్శకుడు శ్రీనివాస్ మాట్లాడుతూ- తాను జీవితంలో చూసిన అనేక యధార్థ సంఘటనలను ఆధారం చేసుకొని సినిమాటిక్‌గా రాసుకున్న కథనే ఈ చిత్రమని తెలిపారు. కంప్లీట్‌గా స్క్రీన్‌ప్లే బేస్డ్ కథనంగా రూపొందిన ఈ చిత్రంలో శివ అద్భుతంగా టైలర్‌మేడ్ పాత్రలా నటించారని అన్నారు. అలాగే వెంకట్ నటించిన పాత్ర కూడా యూనిక్‌గా వుంటుందని, దాదాపు 80 మందిలో చందన ఒక్కతే అమ్మాయిగా ఈ చిత్రంలో నటించిందని, పాటలన్నీ ప్రేక్షకులకు నచ్చుతాయని, త్వరలో విడుదలకు సన్నాహాలు చేస్తున్నామని తెలిపారు. ఈ సినిమాను తెలుగు, హిందీ భాషల్లో తెరకెక్కించామని, అందులో కూడా డబ్బింగ్ తానే చెప్పానని హీరో శివ అన్నారు. పక్కా స్క్రీన్‌ప్లే బేస్డ్ కథనంతో ఒక్కసారి వింటేనే ఈ కథను ఎవరైనా ఇష్టపడతారని, దర్శకుడు కూడా పగలు రాత్రి తేడా లేకుండా కష్టపడి ఈ చిత్రాన్ని తెరకెక్కించాడన్నారు. కొత్తవారితో చేసిన ఈ ప్రయోగం అందరికీ నచ్చుతుందన్న ఆశాభావాన్ని ఆయన వ్యక్తం చేశారు. వెంకట్, ప్రవీణ్ యండమూరి, చందన తదితరులు మాట్లాడారు.