సంపూర్ణవిజయం

2014లో ఎవరెస్ట్ శిఖరాన్ని అధిరోహించి గిన్నిస్ వరల్డ్ రికార్డ్‌లో స్థానం సంపాదించిన మలావత్ పూర్ణ జీవిత కథ ఆధారంగా తెరకెక్కిన చిత్రం 3పూర్ణ. డి.ఎస్. ఆర్.వి మీడియా పతాకంపై పి.వి.ఆర్. పిక్చర్స్ సహకారంతో తెరకెక్కిన ఈ చిత్రం హిందీ తెలుగు భాషల్లో ఇటీవలే విడుదలై విజయవంతంగా ప్రదర్శించబడుతున్న సందర్భంగా శుక్రవారం హైదరాబాద్‌లో విలేఖరుల సమావేశం ఏర్పాటు చేశారు. ఈ కార్యక్రమంలో ప్రవీణ్‌కుమార్ ఐపిఎస్, ఆనంద్, అతిథి, నిర్మాత దేవదాసు మోదుగు, పి.వి.ఆర్ ప్రతినిధి ఉదయ్ మొదలగువారు పాల్గొన్నారు. ఈ సందర్భంగా చిత్ర నిర్మాత దేవదాస్ మోదుగు మాట్లాడుతూ- తెలంగాణ ముద్దుబిడ్డ అయిన పూర్ణ ఎవరెస్ట్ శిఖరాన్ని అధిరోహించి గిన్నిస్ బుక్‌లో చోటు సంపాదించిన విషయం తెలిసిందే. ఆమె జీవిత కథ ఆధారంగా పూర్ణ టైటిల్‌తో ఈ చిత్రాన్ని తెరకెక్కించారు. హిందీలో రూపొందిన ఈ చిత్రాన్ని తెలుగు ప్రేక్షకులకు అందించాలనే సంకల్పంతో ఈ హక్కులు తీసుకున్నాను. నాకు అవకాశం కల్పించిన పి.వి.ఆర్ పిక్చర్స్ వారికి, అలాగే ప్రవీణ్‌కుమార్ ఐపిఎస్‌గారికి ప్రత్యేక ధన్యవాదాలు. ముఖ్యంగా చిత్ర విడుదలకు సహకరించిన తెలంగాణ ప్రభుత్వానికి, అలాగే ఈ చిత్రాన్ని ఆదరిస్తున్న తెలుగు ప్రేక్షకులకు నా ధన్యవాదాలు తెలుపుకుంటున్నాను అన్నారు. ప్రవీణ్ కుమార్ మాట్లాడుతూ- పూర్ణ చిన్న వయసులో ఎవరెస్ట్ శిఖరాన్ని అధిరోహించడం చాలా గొప్ప విషయం. ముఖ్యంగా తెలంగాణ అమ్మాయి ఈ గిన్నిస్ రికార్డును సాధించినందుకు ఆమెను అభినందిస్తూ, ఆమె జీవిత కథను ఎంతమందికో స్ఫూర్తినిచ్చేలా ఈ చిత్రాన్ని తీసిన దర్శక నిర్మాతలను అభినందిస్తున్నాను. తప్పకుండా ఇది ప్రతి ఒక్కరూ చూడాల్సిన చిత్రమన్నారు.
ఎవరెస్ట్ అధిరోహించిన పూర్ణ మాట్లాడుతూ- ఎక్కడో మారుమూల గ్రామంలో పుట్టిన నేను ఎవరెస్ట్ శిఖరాన్ని అధిరోహించడం అదృష్టంగా భావిస్తున్నాను. ప్రవీణ్‌కుమార్ సహకారంతో ఈ అవకాశం దక్కింది. నా జీవిత చరిత్రను సినిమాగా తీయడం మర్చిపోలేని అనుభూతి. ఈ చిత్రాన్ని స్ఫూర్తిగా తీసుకుని నాతోటివాళ్లంతా దేశ ప్రగతికి తోడ్పడాలని కోరుకుంటున్నానన్నారు.