2న నీలంపాటి అమ్మోరు

ప్రముఖ నటుడు సుమన్, శ్యామ్, శ్రీకీర్తిక, బేబి వైష్ణవి ముఖ్యపాత్రల్లో కొమర వెంకటేష్ నిర్మాణ సారథ్యంలో నవ్య మూవీ మేకర్స్ పతాకంపై తోట కృష్ణ స్వీయ దర్శకత్వంలో తెరకెక్కిన చిత్రం ‘నీలంపాటి అమ్మోరు’. అన్ని కార్యక్రమాలు పూర్తిచేసుకున్న ఈ చిత్రం జూన్ 2న విడుదలవుతున్న సందర్భంగా మంగళవారం హైదరాబాద్‌లో ఏర్పాటుచేసిన సమావేశంలో దర్శక నిర్మాత తోట కృష్ణ మాట్లాడుతూ- గుంటూరు జిల్లా పల్నాడు ప్రాంతంలో 700 సంవత్సరాల క్రితం జరిగిన యధార్థ సంఘటనల ఆధారంగా ఈ చిత్రాన్ని తెరకెక్కించాం. గ్రాఫిక్స్ ప్రధానాంశంగా సాగుతున్న ఈ సినిమా అందరికీ నచ్చేలా తీర్చిదిద్దాము. నీలంపాటి అమ్మోరు గురించి చాలామందికి తెలియదు. ఈ సినిమాతో అందరికీ తెలియజెప్పాలోనే సంకల్పంతో సినిమా తీశాను. జూన్ 2న విడుదల చేస్తామన్నారు. సి.కల్యాణ్ మాట్లాడుతూ- కృష్ణ గత 25 సంవత్సరాలుగా ప్రయత్నాలు చేస్తూనే ఉన్నాడు. కానీ, సరైన ఫలితం మాత్రం అందుకోలేకపోతున్నాడు. మంచి భక్తిరస చిత్రంగా నీలంపాటి అమ్మోరు చిత్రాన్ని తెరకెక్కించారు. అమ్మవారి ఆశీస్సులవల్ల ఈ సినిమా మంచి విజయం సాధించి కృష్ణకు మంచి పేరు రావాలని కోరుకుంటున్నాన్నారు. ఈ చిత్రానికి కెమెరా:ఆనంద్, సంగీతం:ఘనశ్యామ్, నిర్మాత, దర్శకత్వం:తోట కృష్ణ.