ఓకేసారి వస్తాం.. బ్రదర్

సీనియర్ యన్‌టిఆర్ జీవితం ఆధారంగా కొడుకు బాలకృష్ణ టైటిల్ రోల్ పోషిస్తున్న చిత్రం -యన్‌టిఆర్. క్రిష్ డైరెక్షన్‌లో శరవేగంగా చిత్రీకరణ జరుపుకుంటున్న ఈ సినిమా జనవరిలో రెండు భాగాలుగా ప్రేక్షకుల ముందుకురానుంది. డిసెంబర్ 16న హైదరాబాద్‌లో ట్రైలర్‌ను విడుదల చేసి, 21న నిమ్మకూరులో ఆడియో విడుదల నిర్వహించాలని చిత్రబృందం తొలుత భావించింది. అయితే, తాజా అప్‌డేట్‌లో రెండు వేడుకలూ ఒకేసారి నిర్వహిచాలని భావిస్తున్నట్టు సమాచారం. రెండు కార్యక్రమాలూ డిసెంబర్ 21నే నిర్వహించాలని నిర్ణయించినట్టు యూనిట్ వెల్లడిస్తూ, ‘యన్‌టిఆర్’లోని బాలకృష్ణ సరికొత్త లుక్‌ను విడుదల చేశారు. యన్టీఆర్ కోసం అప్పట్లో డిజైన్ చేసిన బాబీ కాలర్ మోడల్ తెల్ల చొక్కాను ధరించిన బాలకృష్ణ కళ్లద్దాలు పెట్టుకుని ప్రొజెక్టర్‌పై చేయివేని నిలబడిన స్టిల్‌ను అభిమానుల కోసం విడుదల చేశారు. రెండు పార్టులుగా తెరకెక్కుతున్న ఈ చిత్రం జనవరి 9న ‘కథానాయకుడు’, జనవరి 25న ‘మహానాయకుడు’ పేరిట విడుదల చేయనున్నారు. తొలిభాగంలో ఎన్టీఆర్ సినిమా విశేషాలు, రెండో భాగంలో ఎన్టీఆర్ రాజకీయ ప్రాధాన్యతను చూపించనున్నారు.