అసలేంజరిగింది?

ఎక్సోడస్ మీడియా నిర్మిస్తున్న అసలేం జరిగింది? చిత్రం పోస్టర్‌ను ఎంపీ సంతోష్‌కుమార్ ఆవిష్కరించారు. ఈ సందర్భంగా మాట్లాడుతూ నీలిమ ప్రొడ్యూసర్‌గా శ్రీరాం హీరోగా రూపొందుతున్న చిత్రం విజయవంతం కావాలని ఆకాంక్షించారు. తెలంగాణలో ఇంతవరకూ ఎవరూ తీయని కొత్త ప్రాంతాల్లో షూటింగ్ జరపాలనుకోవడం అభినందనీయమన్నారు. ఇందుకోసం చిత్ర యూనిట్ ఆరు నెలలపాటు తెలంగాణలోని వివిధ ప్రాంతాలను సందర్శించడం గొప్ప విషయమన్నారు. చిత్రం ద్వారా దర్శకుడిగా పరిచయమవుతున్న కెమెరామన్ ఎన్‌వీఆర్‌కు శుభాకాంక్షలు తెలిపారు. శ్రీరాం హీరోగా రూపొందుతున్న చిత్రానికి మ్యూజిక్‌ను మహావీర్ అందిస్తున్నారు. రామ్‌గోపాల్‌వర్మ నిర్మించిన భైరవగీత విలన్ విజయ్‌రామ్ చిత్రంలో ప్రతి నాయకుడి పాత్రలో కనిపించనున్నాడు. చిత్రానికి కథ నెర్లపల్లి వాసు అందించారు. ఫిబ్రవరి 11నుంచి సినిమా షూటింగ్ ప్రారంభమవుతుందని, రెండు షెడ్యూళ్లలో చిత్రీకరణ పూర్తి చేస్తామని నిర్మాత కె నీలిమ తెలిపారు.