పాపులర్ బ్యూటీ!

గత ఏడాది మలయాళంలో మమ్ముట్టితో జోడీ కట్టిన బ్యూటీ హ్యూమ ఖురేషీ తాజాగా సూపర్‌స్టార్ రజనీకాంత్ చిత్రం ‘కాలా’లో అవకాశాన్ని చేజిక్కించుకొని అందర్నీ ఆశ్చర్యపరిచింది. ‘కబాలి’ తర్వాత రజనీకాంత్ మరోసారి గ్యాంగ్‌స్టర్‌గా నటిస్తున్న ఈ చిత్రాన్ని ఆయన అల్లుడు, నటుడు ధనుష్ నిర్మిస్తున్న సంగతి తెలిసిందే. పా రంజిత్ దర్శకత్వం వహిస్తున్న ‘కాలా’ చిత్రంలో సముద్రకని, అంజలి పాటిల్, షియాజీ షిండే ముఖ్య పాత్రలు పోషిస్తున్నారు. సంతోష్ నారాయణన్ సంగీతాన్ని అందిస్తున్న ఈ చిత్రం షూటింగ్ శరవేగంగా చెన్నైలో జరుగుతోంది. ఈ ఇత్రంలో నటించడం గురించి హ్యూమ ఖురేషీ పేర్కొంటూ- ‘‘ రజనీకాంత్ అంతటి సూపర్‌స్టార్‌తో నటించడం సంతోషంగా వుంది. అసలు ఆయనతో నటించే అవకాశం రావడమే అదృష్టం. నేను రజనీసార్‌తో నటించే సన్నివేశంలో ‘కాలా’లో ఎంతో స్పెషల్‌గా వుంటాయి. ఆయన నుంచి నేర్చుకోవలసినవి ఎన్నో ఉన్నాయి. ఈ చిత్రంలో నటించడం ద్వారా చాలా పాఠాలు నేర్చుకుంటున్నా’’ అంటోంది. మోడలింగ్ రంగం నుంచి బుల్లితెరకు ఆపై వెండితెరకు పరిచయమైన ఈ ఢిల్లీభామ 2012లో ‘గ్యాంగ్ ఆఫ్ వస్సేపూర్’తో హీరోయిన్‌గా రంగ ప్రవేశం చేసింది. తొలి చిత్రంతోనే బాలీవుడ్ ప్రేక్షకులను అలరించింది. ఐదేళ్లలో దాదాపు ఇరవై చిత్రాల వరకూ నటించేసిన హ్యూమ పత్రికలకు గ్లామరస్‌గా ఫొటోలు దిగి మరింత పాపులర్ అయింది.