కొత్తగా ఏర్పడింది.. ఇబ్బందులు తప్పవు!

న్యూఢిల్లీ: తెలుగు రాష్ట్రాల ఉమ్మడి హైకోర్టు విభజనను తాత్కాలికంగా వాయిదా వేయాలని కోరుతూ దాఖలైన పిటిషన్‌ను సుప్రీం కోర్టు తోసిపుచ్చింది. ఆంధ్రప్రదేశ్ నూతన రాజధాని అమరావతిలో హైకోర్టు భవనాలు, వౌలిక సాదుపాయలు, జడ్జీల నివాస సముదాయాలు పూర్తయ్యేవరకు హైకోర్టు విభజనపై విడుదలైన గెజిట్ నోటిఫికేషన్‌పై స్టే ఇవ్వాలంటూ ఏపీ న్యాయవాదుల సంఘం సుప్రీం కోర్టులో పిటిషన్ దాఖలు చేసింది. ఏపీ న్యాయవాదులు సంఘం తరపున కె.సీతారాం, కె.జగన్మోహన్‌రెడ్డి సర్వోన్నత న్యాయస్థానంలో పిటిషన్ వేశారు. న్యాయమూర్తులు ఏకే సిక్రీ, అబ్దుల్ నజీర్‌తో కూడిన ధర్మాసనం ముందుకు బుధవారం ఈ పిటిషన్‌పై విచారణ చేపట్టింది. రెండు హైకోర్టులకు సంబంధించి వేర్వేరుగా ప్రమాణ స్వీకారాలు కూడా పూర్తయినందున ఈ పిటిషన్‌పై జోక్యం చేసుకోలేమని ధర్మాసనం స్పష్టం చేసింది. కొత్తగా ఏర్పాటయినప్పుడు చిన్న చిన్న అటంకాలు మామూలేనని ధర్మాసనం అభిప్రాయపడింది.