‘మీడియా సోషలిజాని’కి ముకుతాడు సాధ్యమా?

నిజం ఎప్పటికీ దాగదు. కాస్త అటుఇటుగా కొన్నాళ్ల తర్వాతైనా బయటపడుతుంది. ప్రపంచవ్యాప్తంగా ప్రముఖుల ‘తెరవెనుక’ రహస్యాలను వెలికితీస్తున్న ‘వికీలీక్స్’పై ఎంతగా అణచివేత చర్యలు చేపట్టినా, నిజాలు బహిర్గతం కాకుండా ఎవరూ అడ్డుకట్ట వేయలేరు. ఎవరు అవునన్నా, కాదన్నా ఇప్పుడు సోషల్ మీడియా ఒక బలమైన శక్తి. సోషల్ మీడియా వల్ల నష్టపోతూ దాన్ని కట్టడి చేయాలన్న కాంక్షతో ఉన్న వ్యక్తులు, పార్టీలు కూడా- విధిలేక అదే సోషల్ మీడియాను నిర్వహించుకోవలసిన అనివార్య పరిస్థితి. ప్రపంచానే్న హడలెత్తిస్తున్న అమెరికా అధ్యక్షుడు ట్రంప్‌ను వణికిస్తున్న సోషల్ మీడియాను కట్టడిచేసే ప్రయత్నాలు సాగుతున్నాయి. సోషల్ మీడియాకు స్వేచ్ఛ మంచిదా? కాదా? దాన్ని కట్టడి చేయడం సా ధ్యమా? కాదా? అన్న చర్చకు తెరలేచింది.
నానాటికీ బలంగా విస్తరిస్తున్న సోషల్ మీడియా ఇప్పుడు రాజకీయ పార్టీలకు శాపంగా, ప్రజలకు వరంగా మారింది. రోజువారీ వ్యవహారాలపై స్పందించే వారి సంఖ్య మొదట్లో వందలు, తర్వాత వేలు, ఇప్పుడు లక్షలకు చేరింది. ఈ తరహా ‘స్పందనకారుల్లో’ ఎక్కువమంది ఏ ఎన్నికల్లోనూ క్యూల్లో నిలబడి ఓట్లేసే బాపతు కాదు. కానీ- మరొకరికి నష్టం కలిగించి, ఇతరుల్లో చైతన్యం నింపి, వాస్తవాలు ఆలోచించేంత వరకూ పనికొస్తారు. అది ఒకరికి లాభం కలిగిస్తే, మరొకరికి నష్టం కలిగించవచ్చు. దానికి కారకులను గుర్తించడం కష్టం. ఎందుకంటే సోషల్ మీడియా అంటే తండ్రెవరో, తల్లెవరో తెలియకుండా పుట్టిన అనాథ కాబట్టి. ఇప్పుడదే పార్టీలకు పెను ప్రమాదంగా పరిణమించింది. వాట్సాప్, ఫేస్‌బుక్, టెలిగ్రామ్ వంటి వాటిని ఆయుధంగా చేసుకుని తెదేపా, వైసీపీ, టీఆర్‌ఎస్, కాంగ్రెస్, బిజెపిని నెటిజన్లు ఉతికి ఆరేస్తున్నారు. అయితే అవి తర్వాతి కాలంలో రాజకీయ పార్టీలు, వాటి సానుభూతిపరుల అధిపత్యంలోకి వెళ్లిపోయాయి. ఫలితంగా ఒక పార్టీ మీద మరొక పార్టీ వ్యంగ్యాస్త్రాలు సంధించుకోవడం, ఆరోపణలు చేసుకోవడం, అభూతకల్పనలతో బురద అంటించే సాధనంగా మారిపోయింది. ఇవన్నీ నెటిజన్లకు ఉచిత వినోదంతోపాటు, అందులోని వాస్తవాలు తెలుసుకునే విశే్లషణావేదికగానూ పనికొస్తున్నాయి.
తాజాగా నవ్యాంధ్రలో పార్టీల మధ్య సోషల్ మీడియా వార్ జరుగుతోంది. చంద్రబాబు ప్రభుత్వం తీసుకుంటున్న నిర్ణయాలు, పథకాల్లో అవినీతి, గతంలో వైఎస్ ఏం చేశారు? ఇప్పుడు బాబు ఏం చేస్తున్నారు? లోకేష్ ఏం మాట్లాడుతున్నారు? ఎలా మాట్లాడుతున్నారు? మంత్రుల ముచ్చట్లేమిటి? వంటి అంశాలే అన్ని అండ్రాయిడ్ ఫోన్లలో పరిభ్రమిస్తున్నాయి. ఇవన్నీ వైసీపీ ఏలుబడిలోని సోషల్ మీడియా నిర్వాకమేనన్నది ప్రత్యేకించి చెప్పాల్సిన పనిలేదు. ఈ విషయంలో వైసీపీ ఒక మెట్టు పైనే ఉంది. లోకేష్ వ్యవహార శైలి, ప్రసంగాల్లో తడబాటు వ్యవహారం ఇపుడు ‘నెట్’ ఉన్న ప్రతి ఒక్కరి ఫోన్లలోనూ దర్శనమిస్తోంది. వైసీపీ లోకేష్‌ను చైతన్యరహిత నేతగా జనం ముందు నిలబెట్టడంలో సఫలీకృతురాలైంది. తాజాగా ఆ పార్టీ నేత రోజా మాట్లాడుతూ గూగుల్ సెర్చ్‌లో ‘పప్పు’ అని కొడితే లోకేష్ ఫొటోలు వస్తున్నాయని వ్యం గ్యాస్త్రం సంధిస్తే, ‘పప్పు’ శరీరానికి మంచిదని తమ్ముళ్లు చెప్పుకోవడం ద్వారా రోజా వ్యాఖ్యను నిజం చేసినట్టయింది. పైవారిని మెప్పించేందుకు కిందవాళ్లు చేసే ఓవర్ యాక్షన్ వికటిస్తే ఫలితాలు ఇలాగే ఉంటాయి!
లోకేష్‌ను అప్రతిష్ఠపాలు చేసేందుకు వైసీపీ చేస్తున్న ప్రయత్నాలు క్షేత్రస్థాయిలో చర్చనీయాంశమవుతున్నా యి. ఆయన తరచూ నోరుజారి చేస్తున్న వ్యాఖ్యలు నగుబాటవుతున్నాయన్నదీ నిష్ఠుర నిజం. ఈ క్రమంలో పార్టీ కార్యకర్తలు సహా కింది స్థాయి వరకూ బాబు-లోకేష్ సారూప్యం, సమర్ధతను చర్చించుకుంటున్నారన్నది దాచినా దాగని వాస్తవం. ఈ విషయంలో వైసీపీ సోషల్ మీడియా కార్యకర్తలు కొత్తగా కనిపెట్టిన అద్భుతాలేవీ లేవు. కాకపోతే ‘చినబాబు’ నోరుజారి చేస్తున్న క్లిప్పింగులే ఉంచి, దానికి వ్యంగ్యాస్త్రాలు జోడిస్తున్నారంతే. నాయకత్వం పనితీరు నచ్చక, చినబాబు వ్యవహారశైలి నచ్చని సొంత పార్టీ శ్రేణులు కూడా వీటిని ఆస్వాదించడం లేదనుకుంటే పొరపాటు.
సోషల్ మీడియాలో అన్నీ నిజాలనుకుంటే అది పిచ్చితనమే. నేరుగా ప్రశ్నించేందుకు భయపడేవారు, తమ కోరికలను ప్రచార రూపంలో తీర్చుకునేవారు, ఎదుటివారిని భ్రష్టు పట్టించడమే పనిగా పెట్టుకునే సామాజిక కార్యకర్తలే వీటిని వినియోగిస్తున్నారు. ఇదంతా ఒక్క లోకేష్‌కే పరిమితమైన వ్యవహారం కాదు. బిజెపిని నోటిమాటతో శాసిస్తున్న నెల్లూరు నాయుడుగారిపైనా వ్యంగ్యాస్త్రాలు మొదలయ్యాయి. అవి సొంత పార్టీ వారికి అనందం కలిగిస్తున్నా అందులో నిజానిజాలేమిటన్నది అనుభవిస్తున్నవారికే అర్థమవుతుంది. ఏపిలో బిజెపిని సాధ్యమైనంత వ రకూ ఎదగకుండా నాయుడు గారు పుణ్యం కట్టుకుంటున్నారంటూ వస్తున్న సోషల్ విశే్లషణను తిప్పికొట్టి అసలు నిజాలేమిటో చెప్పుకోవడం తప్ప, ప్రతి ఒక్కరికీ సమాధానం చెప్పడమనేది అసాధ్యం, అ సంభవం. ఎందుకంటే తప్పు లు చేస్తుంటేనే కదా విమర్శకు గురయ్యేది? తప్పులు చేయకపోతే విమర్శకే తావుండదు కదా? లోకేష్‌పై కొద్దికాలంగా వస్తున్న వ్యంగ్యాస్త్రాలు పార్టీ, వ్యక్తిగతంగా చినబాబుకూ నష్టం కలిగించేవే అయినప్పటికీ, తప్పులు ఎత్తిచూపే వారిపై ఆగ్రహించడం తెలివైనపని కాదు. జనంలోకి వెళ్లే ముందు ఏం మాట్లాడాలన్న ముందస్తు కసరత్తు లేకుండా, పక్కనున్న వారు రాసిచ్చినవి చదవడం యువనేతల తప్పే కదా? అసలు తెలుగు భాషపై పట్టు సాధించేంత వరకూ జనంలోకి వెళ్లకుండా బాగుండేమో? పోనీ యువరాజు పక్కనేమైనా రాజకీయాల్లో తలపండినవారు, క్రియాశీల రాజకీయాల్లో కొనసాగుతున్నవారేమైనా ఉ న్నారా? అంటే అదీ లేదు. గుమాస్తాగిరీ స్వభావం ఉన్న వారి నుంచి మేధస్సు ఆశించడం తప్పే కదా?
తప్పులు సరిదిద్దుకుని, విమర్శలకు తావులేకుండా వ్యవహరిస్తే సోషల్ మీడియాకు దొరికే అవకాశమే ఉం డదు. అలాకాకుండా వాస్తవాలు మాట్లాడేవారిని, తెరపైకి తెచ్చే వారిని నియంత్రించాలన్న ధోరణి నేతల అప్రజాస్వామ్య, నియంతృత్వ లక్షణాలను బయటపెడుతుంటాయి. నిజం దాచే ప్రయత్నాలు ఎంత బలంగా చేస్తే, అవి అంతకంటే బలంగా జనాలకు చేరువవుతాయి.
జనం ఒకటి,రెండు పత్రికలు చదివి అవే నిజమని భ్రమించే రోజులు పోయాయి. గత కొనే్నళ్ల వరకూ రాజగురువులుంగారు ఏది చెబితే అదే నిజమని నమ్మేవాళ్లు. ముఖ్యమంత్రి తప్ప మంత్రులు, ఎమ్మెల్యేలు అసమర్ధులు, అవినీతిపరులన్న విచిత్ర ప్రచారం నిజమనుకునేవారు. ఆయన ఆలోచన ప్రకారమే ప్రపంచం పరిభ్రమించాలన్న భ్రమలు తర్వాత పటాపంచలయిపోయాయి. ఆ తర్వాత తెరపైకి వచ్చిన మరో మీడియా కులగురువు ‘రెండో కృష్ణుడి’ అవతారమెత్తి మొదటి రాజగురువుదారిలోనే నడుస్తూ, తాను మెచ్చిన పార్టీని తానే నడిపిస్తున్నట్లు భ్రమలు కల్పిస్తున్నారు. తమ మీదకు వదిలే వార్తల్లో నిజమెంత? అబద్ధమెంత? అవి పార్టీల కోసం రాయించినవా? పైవారిని మెప్పించి కొత్త కాంట్రాక్టుల కోసం రాసినవా? అదీగాకపోతే తన కోర్కెల చిట్టాను పాలకులు పక్కకుపెట్టినందుకు అలిగి రాసిన కథనాలా? అన్నది జనం ఇట్టే చెప్పేస్తున్నారు. ఒకప్పుడంటే ఆ ‘రెండు పత్రికలు’ చెప్పినవే నిజాలని నమ్మే పరిస్థితి. ఇప్పుడు తెదేపా, వైసీపీ, సీపీఎం, సీపీఐకి ఎవరి మీడియా దుకాణాలు వారికున్నాయి. కాబట్టి నిజాన్ని ఎవరు సమాధి చేసే ప్రయత్నాలు చేసినా ‘కనిపించని ఐదో సింహ’మైన సోషల్ మీడియా ఉండనే ఉంది. అందువల్ల నిజాన్ని సమాధి చేయడమంటే గుప్పిట్లో నిప్పును ఎక్కువసేపు ఉంచుకునే సాహసమే.
ఇప్పుడు పరిశుద్ధుడిలా, బాబు పాలనపై సోషల్ మీడియాలో యుద్ధం చేయిస్తున్న జగన్ కట్టుకున్న ఇంధ్రభవనాలపైనా అప్పట్లో ‘సోషల్’గా చర్చ జరిగింది. దానికి ఇప్పటివరకూ ఆయన జవాబివ్వలేదు. జగన్ ఆస్తులు, భవంతులు, అక్రమాలకు సంబంధించి వస్తున్న వ్యంగ్యాస్త్రాలు కూడా నెటిజన్లకు వినోదం కలిగిస్తున్నాయి. కాబట్టి నిజాన్ని ఎవరు దాచాలని చూసినా అభాసుపాలై, జనంలో దానిపై మరింత ఆసక్తిపెంచేందుకు కారకులవుతారన్న ‘అసలు నిజాన్ని’ గుర్తిస్తే మంచిది.
*