మోచేతుల చర్మం మెరవాలంటే..

మిగిలిన భాగాలతో పోలిస్తే మోకాళ్లు, మోచేతుల వద్ద చర్మం మందంగా, నల్లగా ఉంటుంది. ఇంట్లోనే చిన్న చిన్న చిట్కాలను పాటించడం వల్ల మోకాళ్ళ, మోచేతుల వద్ద నల్లగా మారిన చర్మం సైతం పలుచబడి, నునుపుగా తయారవుతుంది.
* చెంచాడు కొబ్బరి నూనె, అరచెంచా నిమ్మరసం కలిపి మోకాళ్లు, మోచేతుల వద్ద రుద్ది, వేడినీళ్లలో ముంచిన టవల్‌తో తుడవాలి. ఇలా వారానికోసారి చేస్తే సమస్య తొలగిపోతుంది.
* మోచేతులు, మోకాళ్ల దగ్గర చర్మం నల్లగా, మందంగా మారితే రోజూ నిమ్మ చెక్కతో ఆ భాగాల దగ్గర రుద్ది పావుగంట సేపు ఆగి వేడినీళ్లతో ముంచిన టవల్‌తో శుభ్రంగా తుడవాలి. ఇలా నెలరోజులపాటు చేయాలి. తర్వాత వారానికి రెండుసార్లు చేస్తూంటే మామూలు చర్మంలా మారిపోతుంది.
* వాల్‌నట్ పొడి, కొబ్బరినూనె కలిపి తరచూ రాస్తుంటే నల్లబడి, గరుకుగా ఉన్న చర్మం సున్నితంగా మారుతుంది.
* రెండు చెంచాల పెరుగుకి కొంచెం బాదం పొడి కలిపి రాసుకున్నా చర్మపు నలుపు తగ్గిపోతుంది.
* గుడ్డులోని తెల్లసొనకు చెంచాడు పంచదార, అరచెంచా జొన్నపిండి కలిపి దానిని గరుకుగా ఉన్న చోట రాసుకుని ఆరాక శుభ్రపరుచుకున్నా మంచి ఫలితం ఉంటుంది.