వెలుగునీడల కలనేత ( మనోగీతికలు)

సీ. విరి ఆమనియొ? కాదు - పెదనోట్ల రద్దనం
తర కాంతి పరిమళనవత కాని;
మహితచైత్రమొ? కాదు - ‘మన్‌కి బాత్’ కలల సా
రథ్యవౌ ‘స్వచ్ఛ భారతము’ కాని;
వర‘హేమలంబ’ సుందరతయా? కాదు - భ
వ్యామరావతి వైభవమ్ము కాని;
కలకోకిలాలాపముల హడావిడొ? కాదు
కవితా ‘రజనిగంధ’ కళయె కాని;
అళుల రొదయొ? ‘ట్రంపు’నినాద గళము కాని;
శుచి ఉగాది పచ్చడి చేదురుచియొ? కాదు -
అమెరికాహత భరత విద్యార్థి కాని;
వెలుగునీడల కలనేత తెలుగుగాది
‘జాగరూకత చెలగుమా! జగతిలోన’
అన్న సందేశమును నీకు అందజేసె!

- డా. రామడుగు వేంకటేశ్వరశర్మ,
చరవాణి : 9866944287
**
అనురాగం పెంచేలా..

చల్లని వెనె్నల్లో చందమామలా
ప్రభాత కిరణాల వెలుతురులా
తొలకరి చినుకల చిరుసవ్వడిలా
పచ్చని పంటచేల పరవశంలా
చిరునవ్వుల చిన్నారి ఆనందంలా
అమ్మపాడే కమ్మని జోలపాటలా
ఆదరణతో అభిమానించే స్నేహితునిలా
ప్రజలకు ప్రాణవాయువునిచ్చే వృక్షంలా
కరవుకాటకాలకు కళ్లెం వేసే కల్పవల్లిలా
మంచిని పంచి మానవత్వం పెంచేలా
అన్నార్తుల ఆకలికి అన్నపూర్ణలా
మనసులలో శాంతిసుమాలు విరిసేలా
మనుషుల మధ్య అనురాగం పెంచేలా
కర్షకుల కళ్లలో కాంతిరేఖలు నింపేలా
చీకటి జీవితాలకు వెలుగుదీపంలా
కోటి ఆశలతో కొంగ్రొత్త కోరికలతో
అందరిలో ఆత్మవిశ్వాసం నింపగా
ఆనందాన్ని పంచ రావమ్మా ‘హేవలంబ’
నవ ఉగాదీ.. నీకిదే
మా శుభ స్వాగతం

- కాకరపర్తి సుబ్రహ్మణ్యం,
చరవాణి : 9848297711
**
ఉగాది ఉషస్సు

నేనొక వసంతగీతికను
చైత్ర ప్రభాత ప్రశాంత వీచికను
తరువు తనువులపై పల్లవించిన పత్రికను
ప్రకృతి, పురుషుల గాఢ పరిష్వంగంలో
ఉదయించిన పుత్రికను
ఆకుల అంచుల నుంచి జాలువారి
తల్లివేరుని తడిమే తుషార బిందువుని
పుప్పొడి రేణువునై -
గాలి అలల మీద తేలియాడే
సుమసుగంధాన్ని
తేటనీటి కెరటమై సెలయేటి కదలికలలో
ధ్వనించే మృదంగనాదాన్ని
ఏటవాలు కొండల్లో పరవళ్లుతొక్కే
జలపాతాల యవ్వనాన్ని
ఎలమావి చివుళ్లు మేసి
రెమ్మల గుబురుల్లో
ఎలుగెత్తి కూసే ఎలకోయిల
స్వరమాధుర్యాన్ని
శిశిరం తెరమరుగయే నిశిరేయి
తారల తోరణాల మాటునుంచి
ఉగాది ఉషస్సు కోసం వేచిచూస్తున్న
వినీలాంబరపు సంబరాన్ని
ప్రకృతిలోని ప్రతి అణువునీ
ప్రేమతో పలకరించుతూ
ఆశలు చిగురించుతూ
హాయిగసాగే ఆమనిని!

- బలభద్రపాత్రుని ఉదయశంకర్,
చరవాణి : 9494536524
**

చైత్ర రథమా..

శే్వతాశ్వములతో
చైత్ర రథమునెక్కి
నేత్రానందము కలుగ
షడ్రుచుల సంగమమై
గున్నమావి గుబురుల
గుబాళింపులై
కోయిల స్వరరాజమై
కొత్త పెండ్లికూతురై
పైరు పంటల పైటవేసి
శుభ పరిణామాల
పారాణి పెట్టి
ప్రకృతి మాత
తిలకము దిద్దగ
ఉదయ కిరణాలు
ముంగురులు సర్దగ
వసంతరాణి
వేలు పుచ్చుకొని
నీతి నియమాల
తోరణాల మధ్య
ఓ నూతన వర్షమా
హేమలంబ రావమ్మా!
మాపాలిటి వరంగా..!!

- మాదిరాజు మాలతి, చరవాణి : 9959133714
**

ఆదిగురువు అమ్మలా..

ఉత్సాహానికి నాంది పలికి
గాభరా పడకుండా
దినదినాభివృద్ధి చెందమని
తెలుపుతుందీ ఉగాది!
ఆవేదన చెందకయా! మానవా!
బతుకు కూడా ఉగాది పచ్చడివలె
తీపి చేదుల సమాహారమే!
పాతకాలాన్ని నెమరువేసి చింతించక,
కొత్తకాలంతో ఉత్సాహంగా పరుగులెత్తు
ఆదిగురువు అమ్మ ఎలాగో
తెలుగువారికి ఉగాది అలాగని!
మరువకుమా.. మానవా!

- సంగాపు లీలాలిఖిత
చరవాణి : 9908427624
**

కాలం సాక్షిగా

భూతకాల వలయంలోంచి
జ్ఞాపకాలు ఎగసిపడుతాయి
భవితాకాశమంతా
ఆశల పూజలు విరబూస్తాయి
వర్తమానమొక్కటే
వాస్తవాలతో జత కడుతుంది
మానవ జన్మ మాత్రం
నూరేళ్ల జీవితమై విస్తరిస్తుంది
కొందరు మాత్రమే
మనిషితనానికి రూపవౌతారు
వాళ్ల అనే్వషణ ప్రవృత్తి అవుతుంది
అనునిత్యం కాలాన్ని గమనిస్తూ
అవాస్తవాలపై కనె్నర్రజేస్తారు
సామాన్యుడిని వేదనల జలధి తాకితే
అక్కడేదో సమస్య మొగ్గ తొడిగినట్లే!
ఒకప్పుడు సిరి సంపదలతో
కాలాన్ని కొలిచిన రాజులు
ప్రజల పాలిట పాలకులయ్యారు
ఇప్పుడు, రోజులు మారాయి అని
అనుకుంటున్నారు అమాయకంగా!
అదే పరిస్థితి మళ్లీ మనిషిని అల్లుకుని
మోసగిస్తున్న దృశ్యం -
ప్రజలను నిస్వార్థంగా
ప్రేమించిన వాళ్లకే కనిపిస్తుంది
ప్రజల శిరస్సులపై ఎక్కి తొక్కుతున్న
ప్రజానాయకులంతా ధనవంతులు కారా!
ఏవర్గం ఆ వర్గానికి
లాభమై వ్యవహరించటం నిజం కాదా!
సామాన్యులకి బాగా తెలుసు
వాళ్లనుభవిస్తున్న బతుకు కష్టాలు
ఐనా, ఐదేళ్లకోసారి
తేనెపూసిన వాగ్దానాలు
పలుకుల ములుకులు గుర్తొస్తున్నా
వౌన ప్రతిమల్లాగ ఓట్లు వేస్తూనే ఉంటారు
అందుకే, పాలనకి మార్గదర్శకాలు
తయారుకావలసిన చట్ట సభలు
క్రమశిక్షణా రాహిత్యాన్ని
ఒంటికి గంధంలాగ పులుముకొంటున్న
ఆకతాయి సందర్భాలవుతున్నాయి
చిత్తశుద్ధిని గాలిలోకి విడిచిన
మూర్ఖత్వపు లోగిళ్లవుతున్నాయి

- ఎస్.ఆర్.పృథ్వి