లక్ష్మణ రేఖ దాటేస్తే

ఇటీవల భర్తను ప్రియుడితో కుమ్మక్కై చంపే భార్యల విషయంలో ప్రచార, ప్రసార మాధ్యమాలు లక్ష్మణ రేఖను దాటాయా ?. ఐపిసి సెక్షన్ల కింద నమోదైన కేసులను కోర్టులు విచారించి నిందితులపై అభియోగాలు రుజువైతే శిక్షను విధిస్తాయి. నిర్దోషిగా తేలితే వదిలేస్తాయి. కాని మీడియా మాత్రం భర్తను చంపే భార్యల పట్ల ఎక్కువగా ఫోకస్ చేసి ప్రతి అంశాన్ని బూతద్దంలో చూసి ప్రసారం చేయడంపై విమర్శలు వస్తున్నాయి. భార్యలను అనుమానించి హత్య చేసే భర్తల కంటే, భర్తలను హత్య చేసే భార్యలను ఎక్కువ దోషం చేసినట్లు చూపిస్తున్నారనే అభిప్రాయం సమాజంలో, ప్రధానంగా మహిళా లోకంలో నెలకొంది. అక్కడక్కడా జరిగే కొన్ని ఘటనలను ఎక్కువ చేసి చూపించి నేరాన్ని ఎదుర్కొంటున్న మహిళను కరడు గట్టిన నేరస్తురాలిగా చూపించడంపై కూడా భిన్న అభిప్రాయాలు వ్యక్తమవుతున్నాయి. ఈ తరహా ఘటనల్లో మీడియా జరిగిన ఘటనలను మాత్రమే చెప్పకుండా, మసాలా, పోపువేసి ఇష్టం వచ్చినట్లు రన్నింగ్ కామెంట్రీ ఇచ్చి, రేటింగ్ పెంచుకునేందుకు వాడుకోవవడం నిజంగా ఆక్షేపణీయం. నేరాలను విచారించే పని కోర్టులు చేయాలి. కాని ఈ పని మీడియా చేయడం తగదు.
-శైలేంద్ర

ఎంత మోసం!
ప్రకటనలు చూసి మోసపోయిన తర్వాత నష్టం తక్కువైతే తేలిగ్గా నవ్వేసి ఇంకో మారు అలాంటి పొరపాట్లు చేయకూడదని నిశ్చయించుకుంటాం. అదే మోసపోయి భారీ మూల్యం చెల్లించి ఉంటే ఆ ఘటనతో తల్లడిల్లిపోతాం. చాలామార్లు తమ అమాయకత్వానికి, అజ్ఞానానికి కూడా నిందించుకోవడం చాలా సహజం. అవగాహన లేమి గుర్తుకొచ్చి బాధపడతాం. ఈ చిన్న విషయం కూడా తెలీదా అన్నట్టు కుమిలిపోతాం. ఇదంతా సామాన్యుల వ్యవహారం. అదే గొప్పగొప్పవాళ్లు కూడా మోసపోతే దానిని ఏమనాలి? బరువుతగ్గించే మాత్రలు ఉన్నాయని ఒక ప్రకటన చూసిన ఉప రాష్టప్రతి ఫోన్ చేస్తే వెయ్యి రూపాయిలు చెల్లిస్తే పంపిస్తామని అన్నారట, వెయ్యి కదా అని పంపితే, ఒక మెయిల్ పంపిస్తూ ఆ మాత్రలతో పాటు మరో మాత్ర కూడా వేసుకోవాలని ఆ సంస్థ చెప్పిందట. దాంతో అర్ధం చేసుకున్న ఉప రాష్టప్రతి ఈ విషయాన్ని వినియోగదారుల వ్యవహారాల మంత్రి రాం విలాస్ పాశ్వన్‌కు చెప్పారట. ఆ ప్రకటన నకిలీదని ఆయన తేల్చారట. అదీ మోసం!
-బి.వి.ప్రసాద్

పోర్న్ స్టార్!
సేవ్ టెంపుల్, స్వచ్ఛ ఆంధ్రప్రదేశ్‌కు బ్రాండ్ అంబాసిడార్‌గా వ్యవహరించిన గజల్ శ్రీనివాస్ ప్రస్తుతం పోర్న్ స్టార్‌గా వెలిగిపోతున్నాడు. తన కార్యాలయంలో పని చేసే రేడియో జాకితో అసభ్యకరంగా ప్రవర్తించి కటకటాల పాలైన గజల్ శ్రీనివాస్ వికృత చేష్టల సన్నివేశాలతో అశ్లీల వెబ్‌సైట్లు నిండిపోయాయి. ఇంతకాలం మంచి గాయకుడిగా మాత్రమే సుపరిచితమైన గజల్ శ్రీనివాస్ ప్రస్తుతం ఫోర్న్ స్టార్‌గా ఆశ్లీల వెబ్‌సైట్లలో ప్రపంచానికంతటికీ పరిచితులయ్యారు.
-వెల్జాల చంద్రశేఖర్

దటీజ్ వెంకయ్య!
ఒక్కసారిగా ఉన్నత పదవులు అందిపుచ్చుకునే వారికి, గ్రామస్థాయి నుంచి అంచెలంచెలుగా ఎదిగిన నేతలకు మధ్య ఎంతో తేడా ఉంటుందనేది భారత ఉప రాష్టప్రతి ముప్పవరపు వెంకయ్య నాయుడును చూస్తే అక్షర సత్యమనిపిస్తుంది. ఈ దేశంలో రాజ్యాంగబద్ధమైన అత్యున్నత పదవుల్లో రాష్టప్రతి పీఠం మొదటిది కాగా, ఉప రాష్టప్రతి స్థానం రెండోది. అయితేనేమి ఈ ప్రొటోకాల్ కొంత ఇబ్బందికరంగా ఉంటోందంటూనే సాధ్యమైనంతమేర ప్రజల్లో కలిసిపోయే ప్రయత్నం చేస్తున్నారు ఉప రాష్టప్రతి వెంకయ్య నాయుడు. మూడు రోజుల పర్యటన కోసం విజయవాడకు సమీపంలోని స్వర్ణ్భారత్ ట్రస్ట్‌కు వచ్చిన వెంకయ్య నాయుడు తొలుత మీడియా ప్రతినిధులు, ఆపై చిరకాల మిత్రులు, అధికారులతో కొంతసేపు గడపటమే కాకుండా అందరి వద్దకి వెళ్లి పేరుపేరున పలకరించి వారితో గ్రూప్ ఫొటోలు కూడా దిగారు. కొసమెరుపు: సెల్‌ఫోన్‌లు మోగనీయకుండా, ఎవరూ అటూ ఇటూ తిరగకుండా, సభలో నిలబడకుండా, తమలో తాము మాట్లాకుండానూ ఆయన చూస్తూ వచ్చారు. ఇదీ ఆయనను అంటిపెట్టుకున్న క్రమశిక్షణ!
-నిమ్మరాజు చలపతిరావు

గడ్డం -
గబ్బర్ సింగ్..!
టి.పిసిసి అధ్యక్షుడు ఎన్. ఉత్తమ్‌కుమార్ రెడ్డి ఇటీవల గడ్డం పెంచారు. ఎందుకు గడ్డం పెంచారో ఎవరికీ చెప్పలేదు. అయినా కాంగ్రెస్‌ను అధికారంలోకి తెచ్చేంత వరకూ గడ్డం తీయరా? అని విలేఖరులు అడిగినప్పుడు మాత్రం ఉత్తమ్ చిరునవ్వుతూ సమాధానాన్ని దాట వేశారు. కానీ ఆ గడ్డం గురించి మాత్రం రాష్ట్ర మున్సిపల్ వ్యవహారాల శాఖ మంత్రి కె. తారక రామారావు చురకలు వేస్తూనే ఉన్నారు. గడ్డాలు పెంచితే అధికారంలోకి రారని, ప్రజల్లో నమ్మకం కలగాలని అన్నారు. తాజాగా ఓ సభలో మాట్లాడుతూ గడ్డం పెంచితే గబ్బర్ సింగ్ కాలేరని, సన్నాసి అవుతారని కెటిఆర్ అనడంతో అక్కడ నవ్వుల జల్లు కురిసింది.
-వి.ఈశ్వర్ రెడ్డి