అనుష్క శర్మ స్థానంలో?

బాలీవుడ్ నటి అనుష్క శర్మ ప్రధాన పాత్రలో నటించిన చిత్రం ‘పరి’. ప్రోసిత్ రాయ్ దర్శకత్వం వహించారు. అనుష్కశర్మ, కర్ణేశ్‌శర్మ, ప్రేరణా అరోరా, అర్జున్ ఎన్.కపూర్ నిర్మాతలుగా వ్యవహరించారు. అనుపమ్‌రాయ్ బాణీలు అందించారు. హిందీలో ఈ నెల 3న విడుదలైన ఈ చిత్రం మంచి విజయాన్ని అందుకుంది. సినిమాలో అనుష్క నటనను ప్రత్యేకంగా ప్రశంసించారు. హారర్ కథాంశంతో రూపొందిన ఈ చిత్రంలో ఆమె విభిన్నమైన పాత్రలో కనిపించారు. కాగా, ఇప్పుడు ఈ సినిమాను తమిళ్‌లో రీమేక్ చేయడానికి సన్నాహాలు చేస్తున్నారట. అనుష్క స్థానంలో నయనతారను దర్శక, నిర్మాతలు అనుకుంటున్నట్లు కోలీవుడ్ వర్గాల సమాచారం. నయన్ ఇప్పటికే ‘డోరా’, ‘మాయ’వంటి హారర్ సినిమాల్లో నటించారు. ఈ నేపథ్యంలో ఆమె అయితేనే పాత్రకు సరిపోతారని అభిప్రాయపడుతున్నారట. దీనికి సంబంధించి అధికారిక ప్రకటన రావాల్సి ఉంది. నయనతార ఇటీవల బాలకృష్ణ ‘జై సింహా’ సినిమాలో కనిపించారు. ఈ సినిమా తర్వాత ఆమె తెలుగులో ‘సైరా నరసింహారెడ్డి’లో నటిస్తున్నారు. చిరంజీవి కథానాయకుడిగా నటిస్తున్న ఈ చిత్రానికి సురేందర్‌రెడ్డి దర్శకత్వం వహిస్తున్నారు. కొణిదెల ప్రొడక్షన్స్ పతాకంపై భారీ బడ్జెట్‌తో రామ్‌చరణ్ సినిమాను నిర్మిస్తున్నారు.