డెత్ సర్టిఫికెట్

చచ్చింది మాత్రం వాస్తవం
భార్యా ఇద్దరు పిల్లల్ని
ఎటూ కాకుంట చేసే
మరణించింది మాత్రం నిజం

అతుకుల సంసారం
గతుకుల తొవ్వ
ఒక్కోసారి తట్టుకొని బోర్లాపడుడు
అప్పుడే లేచి దులుపుకొని నడిసుడు

పొద్దటిది పొట్టకు
మాపటిది బట్టకు
బీడీలు ఎన్ని చేసినా
సాంచాలు ఎంత నడిపినా
బతుక్కు బీడీలు మరింత బిగ్గితైతున్నయ్

ఎంత సదురుకుందామన్నా
ఎవరో గెదిమినట్టు బెదురుడైతంది
కిరాయకున్న యజమాని నెనరు లేక
ఇల్లు ఖాళీ చేయంచతడు
పెనిమిటి పోయ ఏడ్సుడా
నిలువ నీడ లేక ఏడ్సుడా
ఎటూ పాలుపోక గుండె పలుగుతరు

పిల్లలో తెరువు
ఆమె తెర్లూ
ఆధారమనుకున్న దారం చిక్కుపడిపోయంది
ఎల్లీ ఎల్లని బతుకులో లొల్లి లొల్లి
రణం చేయలేక కామ్‌గార్
మరణించింది చేదు వాస్తవం

నేత పరిశ్రమ అధికారి
కండ్లకు పచ్చకామెర్లు సోకి
ససేమిరా చావును నమోదు చేయక
వంకలను ఆశ్రయస్తాడు
అందరికీ తెలిసినా
మరణాన్ని ధ్రువీకరించక
కారణాలను వెతుకుతారు
నడి ఎండల్లో కండ్లల్లో నీళ్లు ఇంకి
చెప్పుల్లేని కాళ్లు అరిగేలా
పెయ్యమీద చెటాకు మాంసం లేనివాళ్లు
గోసోలె అధికారుల చుట్టూ
తిరుగుతూనే వుంటరు

నేత కార్మికుడు చస్తే
సేటుకు నిండుగా మేలైతది
కౌలు రైతు కాలం చేస్తే
పట్టాదారుకు పండుగ వస్తది