నిషేధిత పుష్పాపచయము

చట్టుబండలైన చదువు కాదు
చక్కటి చదువే చదివాడు
వివిధ ప్రయత్నాలతో విసుగు చెంది
సఫలీకృతం కాని ప్రయత్నాలతో
చతికిలపడ్డాడు

నైరాశ్యంతో విరక్తి చెంది
మితభాషి అయన అతనితో
హృదయానికి హత్తుకొనే ప్రియవచనాలు,
హితవచనాలతో
వనమంతా కలియతిరుగుతూ
‘ఎప్పుడో ఒకప్పుడు, ఎక్కడో ఒకచోట
ఎందుకో ఒకందుకు, ఎవరికో ఒకరికి
ఉపయోగపడతావు,
రోజొక్కటితో కాలేదు, రాలేదు
రోము మహానగరమం’టూ
ప్రయత్న కొనసాగింపుకై ప్రోత్సాహక వచనాలు

శ్రమ గమనపు వాహ్యాళిలో
శిరీషాన్నొకదానిని చూపి
ముగ్ధ మనోహర మగువలు
ముచ్చటగా ముడులలో ముడుచుకొనే పూలు కొన్ని
పరమాత్ముని పాద సన్నిధి చేరే
అర్హత, అదృష్టం కలిగిన పుష్పాలు మరిన్ని
అభినందన సంకేతార్పణ గుచ్చంలో
స్థానం పొందిన సుమాలు
ప్రేమ, గౌరవ, ఆవేదనా భావాలతో
పార్థివ శరీరాలంకరణకై చేరిన పుష్పాలు
మధ్యలో చేయజారి మట్టిపాలయ్యేవి కొన్ని -
ఏ సుమానికి ఏ స్థానం లభ్యమో
ఎరిక లేదు గదా ఏ పుష్పానికైనా!

సుమనోహర పారిజాతాలు
కనువిందు కలిగిస్తున్నప్పుడు
బారులు తీరి విరబూసే ఎర్రటి గుల్‌మొహర్
వృక్షాల వరుస బాటలో
సుప్రభాత శ్రమగమనం గావిస్తున్న నాకు
‘ఫూలోంకో తోడ్‌నా మనా హై’ బోర్డు
కోయొద్దు పూలన్న కాపలాదారుని హెచ్చరికలు
ఎదురయ్యాయ

ఉదయానే్న కనువిందు చేసే మందార అందాలు
విరబూచే విరజాజులు
సంధ్యాసమయానికి సడలి, వడలి, వాడి
పతనమై నలిగి, నానిపోయే సుమాలు -
ధరణి మీద పడ్డ పూవు దండగే!
పుడమి మీద పడ్డ పూవు
పూజకి పనికి రాదట!

ఏం చేయలేకుండా ఉన్నానని
ఎంతగానో బాధపడటం కన్నా
ఏం చేయగలనని తెలుసుకునే ప్రయత్నం
ఎంతో మిన్న,
అనపచయ పుష్పంగా మాత్రం
మిగిలిపోకు అన్న.