విదేశంలో పిల్లల పిల్లలు

వాళ్లు ఆంగ్లం అనర్గళంగా మాట్లాడతారు
వారి తెలుగు తెలుగులా ఉండదు
మా తెలుగు వారికి అర్థం కాదు
మా పిల్లలు కూడా
వారితో ఆంగ్లంలోనే మాట్లాడతారు
ఆంగ్లం నేర్చుకున్నా నేర్పుతున్నా
తెలుగులో మాట్లాడమంటాం మేం
వాళ్లు నవ్వేసి ఊరుకుంటారు

ఒక్కోమారు
ఆ పిల్లలు
అలా పోట్లాడుకోవద్దని
మేము వారితో
తెలుగులో నచ్చచెబుతాం

వాళ్లు వినరు
ఇండియా తెలుగు వాళ్లు కదా
వాళ్లు అంతేలే అనుకుంటారు

వారి యాసలో
ఆంగ్లం మాకు రానంత మాత్రాన
అదేమిటి
అంతలోనే
మా ఇంటిలోనే
మేము విదేశీయులమా?